पुणे / प्रतिनिधी :
शिवाजीनगर येथील कोविड केअर सेंटर गैरव्यवहारप्रकरणी खासदार संजय राऊत यांचे व्यावसायिक पार्टनर आणि लाईफ लाईन हॉस्पिटल मॅनेजमेंट सर्व्हिसेसचे संचालक सुजीत पाटकर यांच्या चार जणांविरोधात शिवाजीनगर पोलीस ठाण्यात गुन्हा दाखल करण्यात आला आहे.
याबाबत पुणे महानगर प्रदेश विकास प्राधिकरणाचे (पीएमआरडीए) कार्यकारी अभियंता राजू ठाणगे (वय 47) यांनी शिवाजीनगर पोलीस ठाण्यात फिर्याद दिली आहे. याप्रकरणी लाईफ लाईन हॉस्पिटल मॅनेजमेंट सर्व्हिसेसचे संचालक सुजीत मुकुंद पाटकर, डॉ. हेमंत रामशरण गुप्ता, संजय मदनराज शहा, राजू नंदकुमार साळुंखे यांच्याविरूद्ध गुन्हा दाखल करण्यात आला. ठाणगे यांच्या फिर्यादीनुसार फसवणूक, अपहार तसेच अन्य कलमांन्वये गुन्हा दाखल करण्यात आला असल्याची माहिती शिवाजीनगर पोलिसांनी दिली आहे.
लाईफ लाईन हॉस्पिटल मॅनेजमेंट सर्व्हिसेस कंपनीला अनुभव नसताना पुणे महापालिकेच्या कोरोना काळजी केंद्र चालविण्याचे कंत्राट देऊन मोठा गैरव्यवहार करण्यात आला असून, लाईफ लाईन हॉस्पिटल मॅनेजमेंट सर्व्हिसेस कंपनीचे संचालक सुजित पाटकर यांच्याविरोधात गुन्हा दाखल करण्याची मागणी भारतीय जनता पक्षाचे नेते, माजी खासदार किरीट सोमय्या यांनी केली होती. पाटकर शिवसेनेचे नेते, खासदार संजय राऊत यांचे निकटवर्तीय आहेत. दहा एप्रिल रोजी त्यांनी शिवाजीनगर पोलीस ठाण्यात तक्रार अर्ज दाखल करून संबंधितांविरूद्ध कारवाई करण्याची मागणी केली होती.
प्रशिक्षित मनुष्यबळ नसल्याचा आरोप
कोरोना संसर्ग काळात राज्य शासनाने जुलै 2020 मध्ये कोरोना काळजी केंद्र सुरू केले होते. शिवाजीनगरमधील कोरोना केंद्र चालवण्याचे कंत्राट सुजित पाटकर यांच्या लाईफ लाईन हॉस्पिटल मॅनेजमेंट सर्व्हिसेस कंपनीला देण्यात आले. पीएमआरडीए आणि कोरोना कृती दलाने दिलेल्या नियमांचे त्यांच्याकडून उल्लंघन करण्यात आले. अनुभवी वैद्यकीय तज्ञ तेथे नव्हते. तसेच पुरेसा प्रशिक्षित कर्मचारी वर्ग नसल्याने आठवडाभरात केंद्राच्या कामकाजाबाबत रुग्ण आणि नातेवाइकांनी तक्रारी केल्या. संबंधित कंपनीच्या बेजबाबदारपणामुळे तीन रुग्णांचा मृत्यू झाला होता. संबंधितांनी रुग्णांची पुरेशी काळजी घेतली नाही. त्यांच्याकडे प्रशिक्षित मनुष्यबळाची वाणवा असल्याचे दिसून आले, असे ठाणगे यांनी फिर्यादीत म्हटले आहे.
