मालवण : प्रतिनिधी
महाराष्ट्र चेंबर ऑफ कॉमर्स, इंडस्ट्री ॲंड ॲग्रीकल्चर, ट्रेनिंग शीप रहमान आणि मराठी व अर्थशास्त्र विभागाच्या संयुक्त विद्यमाने स. का. पाटील सिंधुदुर्ग महाविद्यालय, मालवण मध्ये मर्चंट नेव्ही विषयक मार्गदर्शन सत्राचे आयोजन करण्यात आले होते. यावेळी व्यासपीठावर माननीय श्री. आशिष पेडणेकर ,माजी अध्यक्ष महाराष्ट्र चेंबर ऑफ कॉमर्स, प्रमुख मार्गदर्शक वक्ते कॅप्टन डॉ. आशुतोष आपंडकर, कॅप्टन सचिन कांबळे, कॅप्टन अश्विनी देशमुख, कॅप्टन मनिषा कोडे, मा. शशांक कोडे, मा. सुभाष मयेकर, मा. बांदेकर व कृ. सी. देसाई शिक्षण मंडळाचे सचिव मा. श्री. चंद्रशेखर कुशे व संस्थेचे सदस्य मा. श्री. विजय केनवडेकर, प्रभारी प्राचार्य कैलास राबते इत्यादी मान्यवर उपस्थित होते. या कार्यक्रमाचे प्रास्ताविक व सूत्रसंचालन विजय केनवडेकर यांनी केले. प्रारंभी महाविद्यालयाचे माजी विद्यार्थी आणि महाराष्ट्र चेंबर ऑफ कॉमर्सचे कोकण विभागाचे उपाध्यक्ष मा. दिपक मुळीक – परब यांचा “उत्कृष्ट उद्योजक व महाराष्ट्र चेंबर ऑफ कॉमर्स मधील उल्लेखनीय कार्याबद्दल” संस्थेचे सचिव मा. चंद्रशेखर यांच्या हस्ते शाल व श्रीफळ देऊन सत्कार करण्यात आला. प्रभारी प्राचार्य कैलास राबते यांनी कार्यक्रमास शुभेच्छा दिल्या. यावेळी आशिष पेडणेकर यांनी देखील आपले मनोगत व्यक्त केले. कोकणातील विद्यार्थ्यांसाठी व त्यांच्या करियरसाठी सर्वतोपरी मदत करण्याचे आश्वासन त्यांनी दिले. मा. कुशे यांनी संस्थेच्या कार्याची व महाविद्यालयाची उपस्थितांना ओळख करून दिली.
या कार्यक्रमाचे प्रमुख मार्गदर्शक कॅप्टन आशुतोष आपंडकर यांनी आपल्या व्याख्यानातून मर्चंट नेवीचे स्वरूप, परीक्षा पद्धती, उमेदवाराची पात्रता, मर्चंट नेव्ही मधील करियरच्या संधी व टप्पे, तसेच विद्यार्थिनींसाठी दिल्या जाणाऱ्या सवलती तसेच प्रशिक्षण पूर्ण झाल्यानंतर नोकरीच्या संधी प्रेझेंटेशनद्वारे विवेचन केले. ” या सर्व संधींचा लाभ घेण्यासाठी महत्त्वाची अट लागू असते ती म्हणजे हिंमत. विद्यार्थ्यांनी आपल्या गावातून बाहेर पडण्याची, विविध देशांमध्ये जाण्याची व मर्चंट नेवीमध्ये कर्तृत्व दाखवण्याची हिंमत दाखवावी” असे आवाहन केले. तसेच त्यांनी श्रोत्यांच्या विविध प्रश्नांची समाधानकारक उत्तरे दिली .
कॅप्टन सचिन कांबळे यांनी मर्चंट नेव्हीतील संधींचा फायदा घेताना कोणते गुण आवश्यक आहेत याबद्दल विद्यार्थ्यांना मार्गदर्शन केले. मर्स्क या नामांकित शिपिंग कंपनीचे अधिकारी मा. नितीन यांनी प्रशिक्षणाचे विविध टप्पे व मानधन याविषयीचे स्लाइडशो माध्यमातून मार्गदर्शन केले. या कार्यक्रमासाठी शासकीय तंत्रनिकेतन मालवण, एम्. जी. बागवे काॅलेज मसुरे, रामभाऊ परूळेकर महाविद्यालयाचे व स. का. पाटील सिंधुदुर्ग महाविद्यालयाचे विद्यार्थी बहुसंख्य संख्येने उपस्थित होते. तसेच कनिष्ठ, वरिष्ठ महाविद्यालयातील सर्व प्राध्यापक, शिक्षक – शिक्षकेतर कर्मचारी उपस्थित होते. प्रा. स्नेहा बर्वे यांनी सर्वांचे आभार मानले.
