कॅन्टोन्मेंट शाळांच्या समर कॅम्पला प्रारंभ

बेळगाव : कॅन्टोन्मेंट बोर्डच्यावतीने मराठी, उर्दु, इंग्रजी शाळेतील विद्यार्थ्यांसाठी समर कॅम्पचे आयोजन करण्यात आले आहे. याचे उद्घाटन शाळेच्या टर्फ मैदानावर झाले. कॅन्टोन्मेंट बोर्डचे सीईओ राजीवकुमार व आमदार राजू सेठ यांच्या हस्ते उद्घाटन झाले. आमदारांच्या हस्ते क्रीडा साहित्याचे पूजन झाले. कॅन्टोन्मेंट बोर्डच्या तिन्ही शाळांमध्ये जवळपास 1600 हून अधिक विद्यार्थी शिक्षण घेत आहेत. विद्यार्थ्यांच्या शैक्षणिक प्रगतीसोबतच शारीरिक व मानसिक प्रगती व्हावी यासाठी कॅम्पचे आयोजन करण्यात आले आहे. यामध्ये फुटबॉल, हॉकी, व्हॉलीबॉल, हँडबॉल, कबड्डी, स्केटींग या मैदानी खेळांसोबतच संगीत, बुद्धिबळ, स्व-रक्षणासाठी ज्युडो प्रशिक्षण देण्यात येणार आहे. 15 एप्रिलपर्यंत विद्यार्थ्यांना विनामूल्य प्रशिक्षण देण्यात येणार आहे.यासाठी अनेक देणगीदारांनी मदतीचा हात पुढे केला आहे. उद्योजक दिलीप चिटणीस यांनी 25 हजार रु., महेश फौंडेशनकडून 10 हजार रु., दीपक जगदाळे यांच्याकडून 10 हजार रु. असे एकूण 45 हजार रुपयांचे क्रीडा साहित्य कॅम्पसाठी उपलब्ध करून देण्यात आल्याबद्दल आमदारांनी कौतुक केले. यावेळी शाळा सुधारणा समितीचे अध्यक्ष उदयसिंग रजपूत, कॅन्टोन्मेंटचे सरकारनियुक्त सदस्य सुधीर तुपेकर, ऑडिटर मॅरिलिन कोरिया, संतोष दरेकर, सौरभ बिर्जे, सुधाकर चाळके, रोहिणी पाटील यांच्यासह इतर उपस्थित होते.