कॅन्टोन्मेंटने हटवले अनधिकृत जाहिरात फलक

बेळगाव : कॅन्टोन्मेंट हद्दीतील अनधिकृत फलकांवर कारवाईचा बडगा कर्मचाऱ्यांनी उगारला. युनियन जिमखाना रोड, धर्मवीर संभाजी चौक तसेच कॅम्प येथील अनधिकृत जाहिरात व शुभेच्छा फलक कॅन्टोन्मेंट कर्मचाऱ्यांनी हटविले. अनधिकृत फलकांमुळे शहराचे विद्रुपीकरण होत असल्याने ही कारवाई करण्यात आली. शहरातील अनधिकृत फलकांवर महापालिकेकडून कारवाई होते. परंतु, कॅन्टोन्मेंट बोर्ड मात्र अशा कारवाईपासून बऱ्याचदा दूर राहते. यामुळे मध्यवर्ती बसस्थानक तसेच धर्मवीर संभाजी चौक, यंदे खूट, कॅम्प, रेल्वेस्थानक या परिसरात अनेक लहान-मोठे जाहिरात फलक अनधिकृतरित्या लावण्यात आले आहेत. काही फलक कॅन्टोन्मेंटची परवानगी घेऊन लावण्यात आल्याने महसुलात भर पडत असताना अनधिकृत फलकांमुळे महसूल बुडत आहे. मंगळवारी झालेल्या कॅन्टोन्मेंटच्या बोर्ड मिटिंगमध्ये अनधिकृत फलकांबाबत चर्चा झाली. काही ठेकेदारांनी कॅन्टोन्मेंटला जाहिरात फलकांचे शुल्क भरले नसल्याने त्यांच्यावर कारवाई करण्यात आली. त्याचबरोबर लहान-मोठे जाहिरात फलक परवानगीविना बसविण्यात आल्याचे बैठकीवेळी सांगण्यात आले. त्यामुळे शुक्रवारी अनधिकृत फलक हटाव मोहीम कॅन्टोन्मेंट कर्मचाऱ्यांनी राबवली. यामुळे शहरातील मुख्य मार्गावर अनेक दिशादर्शक फलकांनी मोकळा श्वास घेतला.