गोवावेस सर्कलवर कँटरची दुचाकीला धडक : कापोलीचा युवक जागीच ठार

बेळगाव : भरधाव कँटरने मोटारसायकलला ठोकरल्याने कापोली, ता. खानापूर येथील एक युवक जागीच ठार झाला. गुरुवारी सायंकाळी 4 वाजण्याच्या सुमारास गोवावेस सर्कलजवळ ही घटना घडली असून वाहतूक दक्षिण विभाग पोलीस स्थानकात या अपघाताची नोंद झाली आहे. सुनील दिलीप देसाई (वय 42) असे त्याचे नाव आहे. तो मूळचा कापोलीचा असला तरी सध्या शहापूर परिसरात त्याचे वास्तव्य होते. सुनील हा हॉटेलमध्ये शेफ होता. त्याच्या पश्चात आई, पत्नी, मुलगी असा परिवार आहे. अपघाताची माहिती समजताच वाहतूक दक्षिण विभागाचे पोलीस निरीक्षक बसगौडा पाटील व त्यांच्या सहकाऱ्यांनी घटनास्थळी भेट देऊन पाहणी केली. गुरुवारी सायंकाळी सुनील हा आपल्या मोटारसायकलवरून आरपीडीहून गोगटे सर्कलकडे जात होता. त्याचवेळी कँटरची धडक बसून या अपघातात तो जागीच ठार झाला. त्याचा मृतदेह उत्तरीय तपासणीसाठी सिव्हिल हॉस्पिटलमधील शवागारात हलविण्यात आला. गोवावेस सर्कल परिसरात अवजड वाहनांनी अनेकांना चिरडले आहे. वाढते अपघात लक्षात घेऊन ठरावीक वेळेपुरती अवजड वाहनांना बंदी घालण्याची मागणी केली होती. पोलीस प्रशासनाने काही महिन्यांसाठी सकाळी व संध्याकाळी काही ठरावीक वेळेपुरती अवजड वाहनांवर बंदीही घातली होती.