मतदान जागृतीसाठी कॅन्डल रॅली

बेळगाव : आमचे मत आमचा हक्क, आमिषाला बळी पडू नका, आमिषे नाकारून मतदान करा, मतदानापासून कोणीही वंचित राहू नका, मत हे विक्रीसाठी नाही, अशा घोषणा देत मतदान जनजागृती फेरी काढण्यात आली. कॅन्डल फेरी काढून मतदानाची जनजागृती करण्यात आली आहे. विधानसभा निवडणुकीचे मतदान 10 मे रोजी होणार आहे. त्या मतदानामध्ये सर्वांनी सहभाग दर्शवा. यासाठी जिल्हा स्वीप समितीचे अध्यक्ष व जिल्हा पंचायतीचे मुख्य कार्यकारी अधिकारी हर्षल भोयर यांनी यावेळी पत्रकारांशी बोलताना स्पष्ट केले. शहरातून रॅली काढून कित्तूर चन्नम्मा चौक येथे आल्यानंतर त्यांनी पत्रकारांशी संवाद साधला. 80 वर्षांवरील मतदारांना घरपोच मतदान प्रक्रिया याचबरोबर दिव्यांगांसाठीही सोय करण्यात आली आहे. जिल्ह्यामध्ये 80 वर्षांवरील 1 लाख 40 हजार मतदार आहेत. त्यांच्यासाठी ही सोय करण्यात आली आहे. यापूर्वी मतदान करण्यासाठी जनजागृती करण्यात आली आहे. बाईक रॅली, कला स्पर्धा, निबंध स्पर्धा घेऊन याची जनजागृती केल्याचे त्यांनी सांगितले. मंगळवारी कॅन्डल रॅली काढून मतदानाविषयी जनजागृती करण्यात आली. यावेळी जिल्हा पंचायतीचे नियोजन अधिकारी रवी बंगप्पण्णावर, स्वीप आयकॉन राघवेंद्र अणवेकर, डॉ. अशोक शेट्टी, डॉ. ए. बी. पाटील, नर्सिंग कॉलेजचे प्राचार्य नामदेव माळगी, प्रकाश कडोली, साहाय्यक प्रा. डॉ. मंजुळा पाटील यांच्यासह बिम्समधील डॉक्टर, अधिकारी व कर्मचाऱ्यांनी या कॅन्डल रॅलीमध्ये सहभाग घेतला.