उद्या ‘कर्नाटक बंद’ची हाक कदंब, वाहनांची होणार गैरसोय

पणजी : कर्नाटक सरकारच्या एसटी बस कंडक्टर/ड्रायव्हरवर अलिकडच्या काळात झालेल्या हल्ल्याचा निषेध नोंदवण्यासाठी कन्नड समर्थक संघटनांनी उद्या शनिवार दि. 22 मार्च रोजी ‘कर्नाटक बंद’ चे आवाहन केले आहे. त्यामुळे गोवा राज्यातून कर्नाटकात बेळगाव व इतर ठिकाणी जाणाऱ्या प्रवाशांची गैरसोय होण्याची शक्यता आहे. कन्नड समर्थक संघटनांची संयुक्त बैठक बेंगळूर येथे झाली होती. त्यावेळी बंदचा निर्णय घेण्यात आला असून तो जाहीर करण्यात आला आहे. शनिवार 22 मार्च रोजी सकाळी 6 ते सायंकाळी 6 या वेळेत हा बंद पुकारण्यात आला आहे. बंदच्या दिवशी सकाळच्या सत्रात बेंगळूर शहरात निषेध मोर्चा काढण्याचेही ठरवण्यात आले आहे. गोव्यातून कदंब तसेच अनेक खासगी प्रवासी बसगाड्या कर्नाटकात जातात. त्यांच्या वाहतुकीवर परिणाम होण्याची शक्यता वर्तवण्यात आली आहे.