बनावट सोने विकून वेर्णातील व्यवसायीकाला पाच लाखांचा गंडा, दोघांना अटक

वास्को : बनावट सोने विकून वेर्णातील एका व्यवसायीकाला पाच लाखांचा गंडा घातल्या प्रकरणी वेर्णा पोलिसांनी दोघां युवकांना अटक केली आहे. अटक करण्यात आलेले दोघेही महाराष्ट्रातील ठाणे व पुणे भागातील असून रवी सोळंकी(33) व ईश्वर गुजराती(33) अशी त्यांची नावे आहेत. या प्रकरणात एका महिलेचाही सहभाग आहे. फसला गेलेला व्यवसायीक घोगळ मडगाव येथील राहणारा आहे. वेर्णाचे पोलीस निरीक्षक डायगो ग्रासिएस यांनी यासंबंधी दिलेल्या माहितीनुसार ही घटना डिसेंबर महिन्यात घडली होती. त्या दोघा भामट्यांनी एका महिलेसह डिसेंबर महिन्यात तीन वेळा वेर्णातील मनोज सिंग या व्यवसायीकाला भेटून सोने विकत घेण्याचा तगादा लावलेला होता. रत्नागीरी भागातील एका ठिकाणी खोदकाम करताना आम्हाला एका कलशामध्ये सोने मिळाल्याचे त्यानी त्याला सांगितले होते. सोन्याची किंमत वीस लाख रूपये सांगितली होती. परंतु सिंग यांनी आपल्याकडे एवढी रक्कम नसल्याचे स्पष्ट करून ते सोने घेण्यास नकार दिला होता. त्यावर थोड थोड करून देण्याची सुचना त्यांनी केली. परंतु त्यालाही सिंग यांनी नकार दिला. त्यामुळे वीस लाखां ऐवजी केवळ पाच लाख रूपयात हे सोने देण्याची तयारी त्यांनी दर्शवली. वीस लाखांचे सोने पाच लाख रूपयांना मिळत असल्याने सदर व्यवसायीकाने ते सोने विकत घेण्यास होणार दिला. पाच लाख रूपये हाती पडल्यानंतर सदर भामटे तेथून निसटले. त्यानंतर सदर सोने व्यवसायीक सिंग याने एका सोनाराकडे जाऊन तपासले असता ते सोने बनावट असल्याचे उघडकीस आले. त्यामुळे आपण फसलो गेल्याचे सिंग याना कळून आले. शेवटी त्या भामट्यांबाबत जी काही माहिती उपलब्ध होती, ती त्यानी काही लोकांना सांगितली व त्यांच्यावर पाळतही ठेवली होती. तीच माणसे मंगळवारी जवळपास चार महिन्यांनी कुंकळीत फिरत असल्याचे दिसून आले. ही माहिती सिंग यांना मिळताच त्यांनी पोलिसांना माहिती दिली असता पोलिसांनी त्यांना ताब्यात घेतले. या प्रकरणी दोघांनाही पोलिसांनी अटक केलेली असून पोलीस निरीक्षक डायगो ग्रासिएस यांच्या मार्गदर्शनाखाली वेर्णा पोलीस अधिक तपास करीत आहेत.