बेळगाव उत्तरसाठी बुथ कमिटीची बैठक

बेळगाव : बेळगाव उत्तर मतदारसंघातील महाराष्ट्र एकीकरण समितीचे उमेदवार अॅड. अमर येळ्ळूरकर यांच्या प्रचारार्थ बुधवारी मध्यवर्ती निवडणूक प्रचार कार्यालयात बुथ कमिटी नेमणूक करण्याबाबत बैठक घेण्यात आली. या बैठकीला उत्तर मतदारसंघातील महाराष्ट्र एकीकरण समितीचे कार्यकर्ते, आजी-माजी नगरसेवक, महिला मंडळ, युवक मंडळांच्या पदाधिकाऱ्यांना बोलाविण्यात आले होते. बुथ नियोजनाबाबत पियुष हावळ यांनी मार्गदर्शन करत मतदानाच्या दिवसापर्यंत कशा पद्धतीने बुथची हाताळणी करावी, यासंदर्भात माहिती दिली. श्रीकांत कदम, संतोष कृष्णाचे, अंकुश केसरकर, गजानन पाटील, रेणू किल्लेकर, किशोरी कुरणे आदींनी नियोजनासंदर्भात आपले मत व्यक्त केले. बेळगाव उत्तरमध्ये म. ए. समितीला पोषक वातावरण असल्याने जोमाने काम सुरू केले असून शेवटच्या क्षणापर्यंत हा उत्साह कायम ठेवावा, असे आवाहन करण्यात आले. म. ए. समितीच्या आजी-माजी लोकप्रतिनिधींना आपापल्या विभागात बुथ कार्यकर्ते नेमणुकीबाबत आवाहन करण्यात आले. येत्या दोन दिवसांत संबंधितांनी उत्तर मतदारसंघाच्या मध्यवर्ती निवडणूक प्रचार कार्यालयामध्ये संपर्क करण्याचे आवाहन करण्यात आले. या बैठकीला युवावर्ग मोठ्या संख्येने उपस्थित होता.