बेपत्ता इसमाचा मृतदेह सापडला

डिचोली : आमोणा सांखळी येथील पुलावरून थेट मांडवी नदीत उडी घेतलेल्या इसमाचा मृतदेह आखाडा सांतईस्तेव (कुंभारजुवे) येथे खाडीत सापडला. डिचोली अग्निशामक दलाच्या जवानांनी सदर मृतदेह पाण्यातून बाहेर काढला व ओल्ड गोवा पोलिसाच्या ताब्यात दिला. मयताचे नाव संतोष नरसिंह सावंत तळावलीकर (वय 64, रा. तळावली, फोंडा) असे आहे. मयत संतोष सावंत तळावलीकर हे 17 मार्चपासून बेपत्ता होते. ते 17 रोजी सकाळी बाणास्तारी येथील आपल्या मुलीच्या घरातून काही कारणास्तव बाहेर पडले होते. ते परतलेच नसल्याने त्यांचा शोध सुरू होता. त्याचदिवशी सकाळी आमोणा सांखळी येथील पुलावरून एका इसमाने नदीत उडी घेतल्याचे कोणीतरी पाहिले होते. त्यामुळे या नदी पात्रात मृतदेह शोधण्याची मोहीम सुरू होती. काल रवि. दि. 19 मार्च रोजी सकाळी संतोष सावंत तळावलीकर यांचा मृतदेह आखाडा सांतईस्तेव येथे नदीपात्रात आढळून आला. याबाबत डिचोली अग्निशामक दलाला माहिती दिल्यानंतर दलाचे अधिकारी शैलेश गावडे यांच्या मार्गदर्शनाखाली दलाचे उपअधिकारी भारत गावस यांच्या नेतृत्वाखाली गीतेश नाईक या जवानाने सदर मृतदेह बाहेर काढला. या कामी त्यांना विशांत वायंगणकर, गोरेश गावस व अनुप नाईक या दलाच्या जवानांनी सहकार्य केले. अग्निशामक दलाच्या जवानांनी मृतदेह बाहेर काढून ओल्ड गोवा पोलिसांच्या स्वाधीन दिला. ओल्ड गोवा पोलीस या प्रकरणी अधिक तपास करीत आहे. मयत संतोष सावंत तळावलीकर हे केंद्र सरकारच्या रबर बोर्ड येथे कामाला होते. त्यांच्या पत्नीचे वर्षभरापूर्वी निधन झाले होते. त्यांच्या पश्चात तीन विवाहित कन्या आहेत. त्यांच्या मृतदेह उत्तरीय तपासणीअंती नातेवाईकांच्या ताब्यात देण्यात आला. त्यांच्या पार्थिवावर त्याचदिवशी संध्याकाळी अंत्यसंस्कार करण्यात आले.