मार्कंडेय नदीत उडी घेतलेल्या ‘त्या’ इसमाचा मृतदेह अखेर हाती

बेळगाव : मार्कंडेय नदीत उडी घेतलेल्या कंग्राळी खुर्द येथील इसमाचा मृतदेह तब्बल चार दिवसांनंतर अलतगा गावानजीकच्या लहान बंधाऱ्यावर आढळून आला आहे. सचिन माने (वय 45) रा. कंग्राळी खुर्द असे त्यांचे नाव असून घटनेची नोंद काकती पोलीस स्थानकात झाली आहे. सचिन यांनी शनिवारी कंग्राळी येथील मार्कंडेय नदीवरील पुलावरून उडी घेऊन आत्महत्या केली होती. तेव्हापासून एचईआरएफ रेस्क्यू टीमने त्यांचा शोध चालविला होता. घटनेची माहिती समजताच एपीएमसीचे पोलीस निरीक्षक उस्मान अवटी व त्यांच्या सहकाऱ्यांनी भेट देऊन पाहणी केली. कंग्राळी खुर्द एपीएमसी पोलीस स्थानकाच्या हद्दीत येते. त्यामुळे सुरुवातीला एपीएमसी पोलिसांनी मृतदेहाचा शोध घेण्यासाठी प्रयत्न चालविले. शनिवारपासून मंगळवारपर्यंत शोधमोहीम सुरूच ठेवण्यात आली होती. मात्र शोधमोहिमेत अनेक अडचणी येत होत्या. काहीजणांकडून चुकीची माहिती पुरविण्यात आल्याने कोठून सुरुवात करायची व कोणत्या दिशेने मोहीम राबवायची याविषयी निर्णय घेणे रेस्क्यू टीमला अवघड जात होते. अखेर मंगळवारी दुपारी अलतगा गावानजीक मार्कंडेय नदीच्या लहान पुलाजवळ सचिनचा मृतदेह पाण्यावर तरंगताना आढळून आला. घटनेची माहिती समजताच काकतीचे पोलीस निरीक्षक सुरेश शिंगी व त्यांच्या सहकाऱ्यांनी भेट देऊन पंचनामा केला.