खेड/प्रतिनिधी
खेड तालुक्यातील लोटे औद्योगिक वसाहत पुन्हा एकदा स्फोटाने हादरली आहे. येथील डीवाईन केमिकल कंपनीत सॉलवंट केमिकलने पेट घेतल्याने झालेल्या स्फोटामध्ये कारखान्यातील अनेक कामगार होरपळून जखमी झाले आहेत. जखमींपैकी काहींची प्रकृती चिंताजनक असल्याची माहिती उपलब्ध झाली असून प्राथमिक माहितीनुसार तिघांना वाशी येथील बर्न हॉस्पिटलमध्ये हलविण्यात आले आहे.
लोटे औद्योगिक वसाहतीतील डीवाईन ही कंपनी २००७ सालापासून कार्यरत असून ही कंपनी औद्योगीक रसायनचे उत्पादन करते. आज सकाळी कामगार फेब्रिकेशनचे काम करत असताना अचानक सॉलवंट केमिकलने पेट घेतला आणि ही दुर्घटना घडली. या अपघातात पहिल्या पाळीत काम करणारे सुमारे १० ते १२ कामगार होरपळून जखमी झालेत.
जखमी झालेल्या कामगाराना कंपनी व्यवस्थापनाने तात्काळ चिपळूण येथील लाईफ केअर रुग्णालयात उपचारांसाठी नेले मात्र जखमी कामगारांची प्रकृतीचिंताजनक असल्याने लाईफ केअर रुग्णालयाच्या व्यवस्थापने जखमी कामगारांना दाखल करून घेण्यास नकार दिला. त्यानंतर काहीजणांना रुग्णालयात तर काहीजणांना चिपळूण शहरातील एसएमएस रुग्णालयात दाखल करण्यात आले आहे. जखमी कामगारांपैकी तिघांची प्रकृती चिंताजनक असल्याने त्यांना वाशी येथील बर्न हॉस्पिटल मध्ये हलविण्यात आले असल्याची माहिती उपलब्ध झाली आहे. दुर्घटनेनंतर कारखान्याच्या बाहेर पोलिसांचा मोठा बंदोबस्त ठेवण्यात आला होता.
लोटे औद्योगिक वसाहतीतील रासायनिक कारखान्यांमध्ये स्फोट होऊन कामगारांचा बळी जाणे हे आता नित्याचेच झाले आहे. गेल्या काही वर्षात अनेक कामगारांना आपला जीव गमवावा लागला आहे. मात्र व्यवस्थापनाकडून काहीच धडा घेतला जात नाही.
