लोकसभा निवडणुकीत कुठ्ठाळीत भाजपा आघाडी घेईल, कुठ्ठाळी भाजपाचा दावा

वास्को : कुठ्ठाळी मतदारसंघात भाजपाच्या संपर्क से समर्थन अभियानाला चांगला प्रतिसाद लाभला. केंद्र व राज्य सरकारच्या कामगीरीचा जनतेकडून कौतुक करण्यात येत आहे.  कुठ्ठाळीचे अपक्ष आमदार अँथनी वास हेसुध्दा भाजपा सरकारच्या पाठीशी आहेत. त्यामुळे येत्या लोकसभा निवडणुकीत यंदा कुठ्ठाळी मतदारसंघात भाजपाला आघाडी मिळेल असा विश्वास व्यक्त कुठ्ठाळी भाजपाच्या नेत्यांनी व्यक्त केला आहे. लोकसभा निवडणुकीत गोव्यातील दोन्ही जागा भाजपाच जिंकेल असाही दावा नेत्यांनी केला आहे. कुठ्ठाळी मतदारसंघातील भाजपाचे संपर्क से समर्थन अभियान यशस्वीपणे राबवल्यानंतर मंगळवारी वास्कोत घेतलेल्या पत्रकार परिषदेत भाजपाच्या नेत्यांनी कुठ्ठाळीत भाजपाला जनतेकडून उत्स्फुर्त असा प्रतिसाद लाभल्याचे स्पष्ट केले. या पत्रकार परिषदेला भाजपाचे कुठ्ठाळी मतदारसंघाचे प्रभारी चंद्रकांत गावस, मंडळ अध्यक्ष नारायण नाईक, सरचिटणीस अच्चुत नाईक, सांकवाळचे पंच संतोष देसाई, युवा मोर्चा अध्यक्ष सतीश पडवळकर व महिला अध्यक्ष वर्षा पेडणेकर उपस्थित होते. यावेळी चंद्रकांत गावस यांनी कुठ्ठाळीत पक्षाने राबवलेल्या अभियानबाबत माहिती दिली. केंद्र आणि राज्य सरकारच्या कामगीरीबाबत जनतेकडून सकारात्मक प्रतिसाद मिळाल्याचे त्यांनी सांगितले. येत्या लोकसभा निवडणुकीत कुठ्ठाळीत भाजपाला आघाडी मिळेल असा विश्वास त्यांनी व्यक्त केला. स्थानिक आमदार अँथनी वास यांनी भाजपा सरकारला पाठींबा दिलेला आहे. त्यामुळे लोकसभा निवडणुकीत त्यांचेही सहकार्य लाभेल. यंदा दक्षिण गोवा आणि उत्तर गोवा या दोन्ही मतदारसंघा भाजपाच विजयी होईल असे विश्वासही गावस यांनी व्यक्त केला. यावेळी मंडळ अध्यक्ष नारायण नाईक यांनीही भाजपाचे अभियान व सरकारच्या योजना व इतर कार्याविषयी माहिती दिली.