आत्महत्येचा प्रयत्न केलेल्या शेतकऱ्याची घेतली भाजपच्या नेत्यांनी भेट

बेळगाव : गुर्लापूर क्रॉस, ता.मुडलगी येथे ऊस उत्पादक शेतकऱ्यांच्या आंदोलनाच्यावेळी विष पिऊन आत्महत्येचा प्रयत्न करणाऱ्या युवा शेतकऱ्याची भेट घेऊन भाजपचे प्रदेशाध्यक्ष बी. वाय. विजयेंद्र यांनी त्याची विचारपूस केली. दोन दिवसांपूर्वी गुर्लापूर क्रॉसजवळ शेतकरी आंदोलनाच्यावेळी आलकनूर, ता. रायबाग येथील लक्काप्पा गुणदाळ (वय 30) या शेतकऱ्याने विष पिऊन आत्महत्येचा प्रयत्न केला होता. त्याच्यावर खासगी इस्पितळात उपचार करण्यात येत आहेत. बी. वाय. विजयेंद्र, विधान परिषदेचे माजी सदस्य महांतेश कवटगीमठ, अॅड. एम. बी. जिरली, अॅड. हणमंत कोंगाली, मुरगेंद्रगौडा पाटील आदींसह भाजपच्या नेत्यांनी खासगी इस्पितळाला भेट देऊन त्या शेतकऱ्याच्या कुटुंबीयांनाही धीर दिला. यावेळी विजयेंद्र यांनी पालकमंत्र्यांवर टीका केली. पालकमंत्री जवळच आहेत. तरीही त्यांनी शेतकऱ्यांना भेटण्याचे सौजन्य दाखविले नाही, असे त्यांनी सांगितले.