भाजपचे उमेदवार विठ्ठल हलगेकर आज उमेदवारी अर्ज दाखल करणार

खानापूर ; भाजपचे उमेदवार विठ्ठल हलगेकर यांचा उमेदवारी अर्ज बुधवार दि. 19 रोजी भव्य शक्तिप्रदर्शनाने दाखल करण्यात येणार आहे. सकाळी 11 वाजता मलप्रभा क्रीडांगणावरून मिरवणुकीला प्रारंभ होऊन शहरातील प्रमुख मार्गावरून ही मिरवणूक काढण्यात येणार आहे. यानंतर शिवस्मारकातील शिवाजी महाराजांना अभिवादन करून उमेदवारी अर्ज दाखल करण्यात येणार आहे. तालुक्यातील सर्व भाजप कार्यकर्त्यांनी व पदाधिकाऱ्यांनी उपस्थित रहावे, असे आवाहन तालुका अध्यक्ष संजय कुबल यांनी केले आहे. विठ्ठल हलगेकर यांनी मागीलवेळीही भाजपातून निवडणूक लढविली होती. मात्र त्यांचा निसटता पराभव झाला होता. पराभवामुळे खचून न जाता ते गेली पाच वर्षे भाजपच्या कार्यात सक्रिय राहिले. तसेच समाजकार्यात त्यांनी आघाडी घेतली. ग्रामीण भागातील समस्या सोडविणे, तसेच मंदिरे, लोकोपयोगी कामे त्यांनी सातत्याने केली. कोरोनाकाळातही त्यांनी सामाजिक बांधिलकी जपत कार्य केले. मात्र उमेदवारी मिळविण्यासाठी भाजपमधून इच्छुकांची गर्दी झाल्याने तसेच माजी आमदार अरविंद पाटील यांच्या भाजप प्रवेशाने उमेदवारी मिळविण्यासाठी जोरदार रस्सीखेच झाली. त्यामुळे इच्छुक उमेदवारात शेवटपर्यंत उमेदवारी मिळण्याबाबत अनिश्चितता होती. हलगेकर यांची उमेदवारी जाहीर झाल्यानंतर यावर पडदा पडला. सर्व इच्छुक उमेदवारांनी हलगेकर यांच्या विजयासाठी प्रामाणिक प्रयत्न करणार असल्याचे पत्रकार परिषदेत घोषित केले आहे. यामुळे भाजपात चैतन्याचे वातावरण निर्माण झाले असून बुधवारी मोठ्या शक्तिप्रदर्शनाने विठ्ठल हलगेकर यांचा अर्ज दाखल करण्यात येणार आहे.