टार्गेट पूर्ण न झाल्याने कडू शिक्षा

कुठल्याही क्षेत्रात काम करत असताना कंपनीकडून कर्मचाऱ्यांना टार्गेट दिले जाते. ते टार्गेट कर्मचाऱ्यांकडून पूर्ण करून घेण्याची जबाबदारी बॉसची असते. अनेकदा टार्गेट पूर्ण होत नाही तेव्हा बॉस आणि कर्मचारी यांच्यात खटके उडतात. जगभरात खासगी कंपन्यांनी कर्मचाऱ्यांसाठी अनेक नियम लागू केले आहेत. कर्मचाऱ्यांना काही नियमांचे काटेकोरपणे पालन करावे लागते. एका चिनी कंपनीने टार्गेट पूर्ण करण्यात अयशस्वी ठरलेल्या कर्मचाऱ्यांना विचित्र शिक्षा दिली आहे. या कंपनीने कर्मचाऱ्यांना चक्क कडू कारलं खाण्यास भाग पाडले होते. चीनच्या जियांगशू प्रांतात ही विचित्र घटना घडली आहे. सुझोउ दानावो फांगचेंगशी इन्फॉर्मेशन कन्सल्टंट असे या कंपनीचे नाव आहे. ही कंपनी शैक्षणिक आणि प्रशिक्षण क्षेत्रात कार्यरत आहे. टार्गेट पूर्ण करू न शकलेल्या अनेक कर्मचाऱ्यांना त्यांच्या बॉसकडून विचित्र शिक्षा देण्यात आली. या कर्मचाऱ्यांना कार्यालयात येताच एका रांगेत उभे करून कडू कारले खाण्यास सांगण्यात आले. या शिक्षेबद्दल सोशल मीडियावर होणारी टीका पाहता संबंधित कंपनीने आता स्पष्टीकरण दिले आहे. कंपनीने स्पष्टीकरण दिल्यावरही सोशल मीडियावर संताप व्यक्त होत आहे. झोंग नावाच्या कर्मचाऱ्याने व्हिडिओ शेअर केल्यावर संबंधित प्रकार सर्वांसमोर आला. या व्हिडिओमुळे सोशल मीडियावर चर्चा सुरू झाली आहे. कंपनीवर कारवाई करण्याची मागणी केली जात आहे. अनेक कंपन्या खराब कामगिरीनंतर कर्मचाऱ्यांना कामावरून कमी करतात, परंतु चीनमधील हा प्रकार मात्र अत्यंत विचित्र होता.