भुवनेश्वर (ओडिशा)
भारतीय महिला लीग फुटबॉल स्पर्धेंत रविवारी येथे झालेल्या सामन्यात एसएसबी एफसी महिला फुटबॉल संघाने माता रूक्मिणी एफसी संघाचा 7-1 अशा गोलफरकाने दणदणीत पराभव केला.
पश्चिम बंगालच्या एसएसबी एफसी संघातील सुमीला चानूने शानदार हॅट्ट्रीक नोंदविली. 18 व्या मिनिटाला एफसी एसएसबी संघाचे खाते सुमीला चानूने उघडले. 30 व्या मिनिटाला एसएसबीचा दुसरा गोल तिनेच नोंदविला. माता रूक्मिणी संघाची गोलरक्षक मीना कश्यपने नजरचुकीने आपल्याच संघाच्या गोलपोस्टमध्ये चेंडू मारल्याने एसएसबी संघाला तिसरा बोनस गोल मिळाला. मध्यंतरापर्यंत एसएसबीने 3-0 अशी आघाडी मिळविली होती. सामन्यातील उत्तरार्धात एसएसबी संघाने आणखी चार गोल केले. 48 व्या मिनिटाला सुमीला चानूने चौथा गोल तर 50 व्या मिनिटाला एसएसबीचा पाचवा गोल नोंदविला गेला. माता रूक्मिणीतर्फे एकमेव गोल किरण पिसदाने केला. एसएसबीचा सहावा गोल 63 व्या मिनिटाला संध्या कश्यपने नोंदविला. सुमीला चानूने सामना संपण्यास पाच मिनिटे बाकी असताना आपल्या संघाचा सातवा तर वैयक्तिक तिसरा गोल नोंदवून हॅट्ट्रीक साधली. या सामन्यात एसएसबी एफसी संघाला 3 गुण मिळाले.
