ऑनलाईन टीम/तरुण भारत
LPG Gas Cylinder Price : देशातील महागाईने त्रस्त असलेल्या जनतेला महिन्याच्या पहिल्याच दिवशी मोठा दिलासा मिळाला आहे. गगनाला भिडणाऱ्या गॅस सिलिंडरच्या (Gas Cylinder) दरांत तब्बल १०० रुपायांनी कपात करण्यात आली आहे. मात्र, ही दरकपात केवळ व्यावसायिक सिलिंडरवरच झाली असून, १४.२ किलोचा घरगुती एलपीजी सिलिंडर जुन्या किंमतीतच उपलब्ध असणार आहे. तर, दिल्लीत इंडेनच्या १९ किलोच्या व्यावसायिक सिलिंडर दरात ९१.५० रुपयांची घट झाली, कोलकात्यात १०० तर मुंबईत ९२.५० तर चेन्नईत ९६ रुपयांनी कपात करण्यात आली आहे.
दर महिन्याच्या एक तारखेला गॅस सिलिंडरच्या किंमती गॅस कंपन्या ठरवत असतात. त्याप्रमाणे गेल्या महिन्यातही व्यावसायिक सिलिंडरच्या दरांत ३६ रुपायंची कपात करण्यात आली होती. गॅ सिलिंडर दरांत कपात करण्यात आल्यानंतर दिल्लीत प्रति सिलिंडर १८८५ रुपये मोजावे लागणार आहेत. तर, मुंबईत व्यावसायिक गॅस सिलिंडरसाठी १८४४ रुपये मोजावे लागणार आहेत. हाच दर कोलकातामध्ये १९९५.५ रुपये आहे.
घरगुती गॅस सिलिंडरचे दर जैसे थे
दरम्यान, ६ जुलैपासून घरगुती गॅस सिलिंडरच्या दरात कोणताही बदल करण्यात आलेला नाही. मुंबईत सध्या गॅस सिलिंडरची किंमत १०५२ रुपये आहे. तर दिल्लीत १०५३ रुपये, कोलकाता १०७९ रुपये आणि चेन्नईमध्ये १०६८ रुपये आहेत.
