आज-उद्या नवी दिल्लीत ‘सोल’ लीडरशिप कॉन्क्लेव्ह : पंतप्रधान नरेंद्र मोदी करणार उद्घाटन
वृत्तसंस्था/नवी दिल्ली
पंतप्रधान नरेंद्र मोदी 21 फेब्रुवारी रोजी नवी दिल्लीतील भारत मंडपम येथे पहिल्या सोल (एसओयूएल) लीडरशिप कॉन्क्लेव्हचे उद्घाटन करतील. यावेळी ते उपस्थितांना संबोधितही करतील. पंतप्रधान कार्यालयाकडून (पीएमओ) गुरुवारी यासंबंधीची माहिती देण्यात आली. भूतानचे पंतप्रधान दाशो त्शेरिंग तोबगे हे या कार्यक्रमाला प्रमुख पाहुणे म्हणून उपस्थित राहणार असून उद्घाटनपर भाषण देतील. तोबगे यांचे गुरुवारी दुपारी भारतात आगमन झाले असून त्यांचे विमानतळावर शिष्टाचाराने स्वागत करण्यात आले.
एसओयूएल (स्कूल ऑफ अल्टिमेट लीडरशिप- सोल) लीडरशिप कॉन्क्लेव्ह 21-22 फेब्रुवारी रोजी दोन दिवस आयोजित करण्यात आली आहे. या परिषदेमध्ये विविध क्षेत्रातील अनुभवी नेते आपले जीवन अनुभव आणि नेतृत्वाशी संबंधित महत्त्वाच्या बाबींवर भाष्य करतील. या कार्यक्रमात राजकारण, क्रीडा, कला, माध्यमे, अध्यात्म, सार्वजनिक धोरण, व्यवसाय आणि सामाजिक क्षेत्रातील प्रतिष्ठित व्यक्ती सहभागी होतील. तरुण नेत्यांना प्रेरणा देणे आणि नेतृत्व कौशल्ये अधिक विकसित करण्यासाठी नवीन कल्पनांची देवाण-घेवाण करणे हे यामागील उद्दिष्ट आहे.
‘सोल’ ही गुजरातमध्ये स्थापन झालेली एक उदयोन्मुख नेतृत्व संस्था आहे. भारतातील राजकीय नेतृत्वाचा विस्तार करणे आणि केवळ राजकीय कुटुंबांपुरते मर्यादित न ठेवता क्षमता, वचनबद्धता आणि सार्वजनिक सेवेची भावना असलेल्या लोकांना प्रोत्साहन देणे हे त्याचे मुख्य उद्दिष्ट आहे. आजच्या गुंतागुंतीच्या जगात नेतृत्व आव्हानांना चांगल्या प्रकारे समजून घेण्यासाठी आणि त्यांचे निराकरण करण्यासाठी ही संस्था नेतृत्वाबद्दल नवीन विचारसरणी, आवश्यक कौशल्ये आणि कौशल्य यावर मार्गदर्शन करत असते.
