विश्रुत चषक 12 वर्षाखालील क्रिकेट स्पर्धा
बेळगाव : युनियन जिमखाना आयोजित विश्रुत चीट प्रायव्हेट लिमिटेड पुरस्कृत बारा वर्षाखालील मुलांच्या विश्रुत चषक क्रिकेट स्पर्धेत बेळगाव स्पोर्ट्स क्लबने युनियन जिमखानाचा 5 गडय़ांनी तर नीना स्पोर्ट्सने आनंद अकादमी संघाचा 1 गडय़ाने पराभव करून अंतिम फेरीत प्रवेश केला. कनिष्क वेर्णेकर (बेळगाव स्पोर्ट्स क्लब), समर्थ चौगुले (निना) यांना सामनावीर पुरस्कार देण्यात आला.
पहिल्या उपांत्य सामन्यात युनियन जिमखाना संघाने 25 षटकात सर्वबाद 101 धावा केल्या. अनिश तेंडुलकरने 28 धावा केल्या. बेळगाव स्पोर्ट्स क्लबतर्फे कनिष्क वेर्णेकरने 3, श्रीविक्रम व इम्तियाज मंडल यांनी प्रत्येकी 2 गडी बाद केले. उत्तरादाखल बेळगाव स्पोर्ट्स संघाने 20.1 षटकात 5 बाद 102 धावा करून सामना 5 गडय़ांनी सामना जिंकला. लक्ष खतायेतने 35, आरुष पुत्रणने 34 धावा केल्या. युनियन जिमखानातर्फे फरहान शेखने 3, मोहम्मद हमजा यांनी दोन गडी बाद केले.
दुसऱया उपांत्य सामन्यात आनंद क्रिकेट अकादमी संघाने 25 षटकात सर्वबाद 104 धावा केल्या. ओजस गडकरीने 19, श्लोक चडीचालने 15 धावा केल्या. नीनातर्फे अम्मार पठाण व जियान सलीमवाले यांनी प्रत्येकी 2 गडी बाद केले. उत्तरादाखल नीना स्पोर्ट्स क्लबने समर्थ चौगुलेच्या झंझावाती अर्धशतकाच्या जोरावर विजय मिळवून अंतिम फेरीत धडक मारली. समर्थ चौगुलेने 47 चेंडूत 7 चौकार व 4 षटकारांसह 74 धावा केल्या. आनंद अकादमीतर्फे समर्थ करडीने 2 तर अथर्व करडी व श्लोक चडीचाल यांनी प्रत्येकी एक गडी बाद केला. शनिवारी अंतिम सामना ः बेळगाव स्पोर्ट्स क्लब वि. नीना स्पोर्ट्स क्लब सकाळी 9.30.वाजता.
