केएससीए 16 वर्षाखालील आंतरक्लब क्रिकेट स्पर्धा
बेळगाव : कर्नाटक राज्य क्रिकेट संघटना मान्यताप्राप्त धारवाड विभागीय क्रिकेट संघटना आयोजित केएससीए 16 वर्षाखालील आंतरक्लब क्रिकेट स्पर्धेच्या मंगळवारी खेळविण्यात आलेल्या सामन्यात बेळगाव स्पोर्ट्स क्लबने आनंद क्रिकेट अकादमी संघाचा 5 गड्यांनी तर टॅलेंट स्पोर्ट्स क्रिकेट अकादमीने बीसीएचा 10 गड्यांनी पराभव केला. निल पवार, प्रितम सोनकापूर यांना सामनावीर पुरस्कार देण्यात आला. केएससीएच्या मैदानावर खेळविण्यात आलेल्या पहिल्या सामन्यात आनंद क्रिकेट अकादमी संघाने प्रथम फलंदाजी करताना 41.6 षटकात सर्व गडी बाद 136 धावा केल्या. त्यात सुप्रित गेंजीने 4 चौकारांसह 33, तनिष्क जैनने 14, निलेश आर व सुमीत के. यांनी प्रत्येकी 11 तर लक्ष्य वेर्णेकरने 10 धावा केल्या. बेळगाव स्पोर्ट्स क्लबतर्फे निल पवारने आपल्या फिरकी गोलंदाजीवर 21 धावात 5 गडी बाद करत निम्मा संघ गारद केला. त्याला सोहम पाटील, सागर पाटील, सुरेंद्र पाटील यांनी प्रत्येकी 1 गडी बाद करत सुरेख साथ दिली.
प्रत्युत्तरादाखल खेळताना बेळगाव स्पोर्ट्स क्लब अ संघाने 47 षटकात 5 गडी बाद 137 धावा करुन सामना 5 गड्यांनी जिंकला. त्यात आशितोष हिरेमठने 6 चौकारांसह 52, अर्णव कुंदपने 2 चौकारांसह 19, निल पवारने 16, संकेत सुतारने 2 चौकारांसह 14 तर सोहम पाटीलने 2 चौकारांसह नाबाद 11 धावा केल्या. आनंदतर्फे सुमीत, लक्ष्य वेर्णेकर, लाभ वेर्णेकर व ओम जकाती यांनी प्रत्येकी 1 गडी बाद केला. दुसऱ्या सामन्यात व्हीसीए संघाने प्रथम फलंदाजी करताना 16.5 षटकात सर्व गडी बाद 58 धावा केल्या. त्यात अमोल शिंदोळकरने 2 चौकारांसह 12, निश्चल हिरेमठने 2 चौकारांसह 10 धावा केल्या. टॅलेंट स्पोर्ट्स क्लब हुबळीतर्फे प्रितम सुनकापूरने 8 धावात 5 तर पृथ्वीने 18 धावात 5 गडी बाद केले. प्रत्युत्तरादाखल खेळताना टॅलेंट स्पोर्ट्स हुबळीने 8.2 षटकात बिनबाद 60 धावा करुन सामना 10 गड्यांनी जिंकला. त्यात अभिनव एस.ने 4 चौकारांसह नाबाद 25 तर जॉय सुल्लदने 3 चौकारांसह नाबाद 24 धावा केल्या.
