साऊथ झोन स्पर्धेत बेळगावच्या खेळाडूंची चमक

बेळगाव : आंध्रप्रदेश येथे 36 व्या साऊथ झोन कनिष्ठ अॅथलेटिक्स स्पर्धेत कर्नाटकच्या (बेळगाव जिल्हा) तीन खेळाडूंनी दोन सुवर्ण व एक रौप्यपदक पटकावित यश संपादन केले. नागार्जुनगर, गोंटूर, आंध्रप्रदेश येथे झालेल्या साऊथ झोन कनिष्ठ अॅथलेटिक्स स्पर्धेत मुलीच्या भालाफेकमध्ये भाव्या सी.जे.ने 51.55 मी.चा पल्ला गाठत सुवर्णपदक पटकाविले. मुलांच्या गटात भालाभेकमध्ये बेळगावचा कल्लोलेप्पा बंडीवड्डरने 62.74 मी.चा भालाफेक करत दुसऱ्या क्रमांकासह रौप्य पदक मिळविले. मुलींच्या हातोडाफेकमध्ये बेळगावच्या स्पृहा नाईकने 38.92 इतकी फेक करत सुवर्णपदकाला गवसणी घातली. या विजेत्या स्पर्धकांना मान्यवरांच्या हस्ते पदके, प्रमाणपत्र देवून गौरविण्यात आले. तिन्ही स्पर्धकांना बेळगावचे अॅथलेटिक प्रशिक्षक संजीवकुमार नाईक, बसवराज भुसण्णवर, मधुकर देसाई यांचे मार्गदर्शन तर युवजन क्रीडाधिकारी बी. श्रीनिवास यांचे प्रोत्साहन लाभत आहे.