क्रेडाई वूमन्स विंगतर्फे कुवेंपूनगर चौकाचे सुशोभिकरण

बेळगाव : क्रेडाई वूमन्स विंगने कुवेंपूनगर चौक येथे नूतन शिल्प उभारले असून या चौकाचे सुशोभिकरण केले आहे. याचे उद्घाटन महिला व बाल कल्याण खात्याच्या मंत्री लक्ष्मी हेब्बाळकर यांच्या हस्ते नुकतेच करण्यात आले. सदर चौकासाठी साडेतीन लाख रुपयांचा निधी खर्च करण्यात आला आहे. यावेळी बोलताना लक्ष्मी हेब्बाळकर म्हणाल्या, क्रेडाई वूमन्स विंग शहर सुशोभिकरण करण्याच्यादृष्टीने प्रयत्नशील आहे, ही कौतुकास्पद बाब आहे. राज्य सरकार महिला सक्षमीकरणासाठी प्राधान्य देत आहे. बेळगावमधील विविध संस्थांमधील महिलांच्या सक्षमीकरणासाठी आपण नेहमीच प्रयत्नशील राहू. क्रेडाई वूमन्स विंगच्या समन्वयक दीपा वांडकर यांनी आपण शहरातील अन्य ठिकाणीही असे उपक्रम राबविणार असल्याचे स्पष्ट केले. सचिव करुणा हिरेमठ यांनीही मनोगत व्यक्त केले. याप्रसंगी क्रेडाईचे अध्यक्ष युवराज हुलजी, माजी अध्यक्ष दीपक गोजगेकर, आनंद कुलकर्णी, प्रशांत वांडकर, डी. ए. सायनेकर, पी. एस. हिरेमठ, अमर अकणोजी प्रमुख पाहुणे म्हणून उपस्थित होते. कार्यक्रमासाठी क्रेडाईच्या पदाधिकारी अपर्णा गोजगेकर, सीमा हुलजी, नीतू जवळकर, नुरिया शेख, आर्किटेक्ट सायली अकणोजी,धनश्री बैलूर यांनी पुढाकार घेतला.