बांगलादेशी घुसखोरास म्हापशात अटक

म्हापसा : भारतात घुसखोरी करून अवैधरित्या म्हापसा शहरात फिरणाऱ्या बांगलादेशी युवकास कर्तव्यदक्ष पोलिसांनी अटक केली. मोहम्मद जहांगी मोंडल ऊर्फ जहांगीर मोंडल (24) असे संशयिताचे नाव आहे. भारत-बांगलादेश सीमेवरील शेतांमधील पायवाटा तुडवत तो देशात आला व तेथून रेल्वेमार्गे गोव्यात दाखल झाला, असे पोलीस तपासात समोर आले आहे. तो वैध कागदपत्रांविना ओळख लपवत छुप्या मार्गाने भारत-बांगलादेश सीमेवरून देशात येऊन म्हापसा परिसरातील रस्त्यावर फिरत असताना बिट पेट्रोलिंग करणारे कर्तव्यदक्ष पोलीस उपनिरीक्षक दिनेशकुमार मुखिया, हेड कॉन्स्टेबल सुशांत चोपडेकर व तुकाराम शिरोडकर यांनी या संशयितास शिताफीने ताब्यात घेत नंतर त्यास रितसर अटक केली. याप्रकरणी म्हापसा पोलिसांनी संशयिताविरोधात विदेशी कायदा व पासपोर्ट प्रवेश कायद्यांतर्गत गुन्हा नोंद केला आहे. पोलीस उपअधीक्षक जिवबा दळवी यांच्या मार्गदर्शनाखाली निरीक्षक सीताकांत नायक, तसेच उपनिरीक्षक दिनेशकुमार मुखिया, उपनिरीक्षक गौरव नाईक, हवालदार सुशांत चोपडेकर यांनी ही कारवाई केली.