ढवळी येथे 7 रोजी बाल युवा कीर्तन संमेलन

फोंडा : गोमंतक संत मंडळ संचालित कीर्तन विद्यालय आणि अंत्रुज पत्रकार संघ फोंडा यांच्या संयुक्त विद्यमाने शुक्रवार 7 एप्रिल रोजी बाल कीर्तन युवा संमेलन आयोजित करण्यात आले आहे. ढवळी येथील लोकविश्वास प्रतिष्ठानच्या सिद्धार्थ बांदोडकर सभागृहात हे संमेलन होणार असून त्यात 10 बाल व युवा कीर्तनकार किर्तने सादर करणार आहेत. दुपारी 3 वा. संमेलनाला सुरुवात होईल व सायं. 5 वा. उद्घाटन सोहळा होणार आहे. उद्घाटन सोहळ्याला प्रमुख पाहुणे म्हणून समाज कार्यकर्ते मिथिल ढवळीकर तसेच लोकविश्वास प्रतिष्ठानचे अध्यक्ष अनुप प्रियोळकर, अंत्रुज पत्रकार संघाचे अध्यक्ष नरेश गावणेकर, लेखिका दीपा मिरिंगकर व गोमंतक संत मंडळाचे अध्यक्ष कीर्तनकार सुहासबुवा वझे हे व्यासपीठावर उपस्थित असतील. संमेलनात विविध विषयांवर कीर्तने सादर होणार असून त्यात ह. भ. प. संचित मणेरीकर, आश्ना भगत, साईम नाईक, सिद्धी दाभाळे, रामानुज जोशी, पवन पै खोत, गुरुचरण सांगोडकर, सानवी भट, सर्वेश साळगावकर, श्रेया इंगळे हे बाल व युवा कीर्तनकार किर्तने सादर करणार आहेत. त्यांना साईराज केरकर, दीपक पेंडसे, रुद्राक्ष वझे, दामोदर कामत, देवानंद सुर्लकर हे साथसंगत करतील. गोमंतक संत मंडळ संचालित कीर्तन विद्यालयातर्फे गोव्यात नवीन कीर्तनकार घडविण्यासाठी गेल्या अनेक वर्षांपासून विविध उपक्रम राबविले जात आहेत. आत्तापर्यंत 28 कीर्तन प्रशिक्षण शिबिरे आयोजित करण्यात आली आहे. मंडळाच्या माध्यमातून फोंडा कीर्तन विद्यालय, देवकीकृष्ण कीर्तन विद्यालय माशेल व लक्ष्मीनारायण कीर्तन विद्यालय म्हापसा ही तीन विद्यालये सुरु आहेत. विविध समाजातील शंभरहून अधिक कीर्तनकार तयार झाले असून गोव्यातील विविध उत्सवांबरोबरच गोव्याबाहेरही त्यांनी किर्तने सादर केली आहेत. पौराणिक विषयाबरोबरच, राष्ट्रीय पुरुष व सामाजिक विषयांवर अनेक ठिकाणी या विद्यार्थ्यांची किर्तने झाली आहेत. विद्यालयाचे प्राचार्य सुहासबुवा वझे यांनी बाबासाहेब आंबेडकर यांच्या जीवनावर कीर्तन संहिता लिहून अनेक ठिकाणी विद्यार्थ्यांच्या माध्यमातून सादर केली आहेत. मराठी, हिंदी व इंग्रजीतही हे नवोदित किर्तनकार उत्स्फूर्तपणे किर्तने सादर करीत आहेत.