महामेळाव्याच्या ‘त्या’ खटल्यात दोघांना जामीन

बेळगाव : बेकायदेशीर महामेळाव्याचे आयोजन केल्याप्रकरणी म. ए. समितीच्या दोघा कार्यकर्त्यांवर गुन्हा दाखल करण्यात आला होता. त्या कार्यकर्त्यांना न्यायालयाने जामीन मंजूर केला आहे. संतोष मंडलीक आणि सूरज कणबरकर अशी त्यांची नावे आहेत. म. ए. समितीच्यावतीने 2021 साली महामेळाव्याचे आयोजन करण्यात आले होते. या मेळाव्यानंतर म. ए. समितीच्या 29 जणांवर गुन्हा दाखल करण्यात आला होता. त्यामधील 27 जणांनी यापूर्वी जामीन घेतला होता. तर दोघांनी जामीन घेतला नव्हता. त्यांनी मंगळवारी जेएमएफसी चतुर्थ न्यायालयात उपस्थित राहून जामीन घेतला आहे. 30 हजार रुपयांचे वैयक्तिक हमीपत्र, तितक्याच रकमेचा एक जामीनदार, यापुढे अशा प्रकारचा गुन्हा पुन्हा करू नये, पोलिसांना सहकार्य करावे, या अटींवर त्यांना जामीन मंजूर करण्यात आला आहे. टिळकवाडी पोलीस स्थानकामध्ये महापालिका अधिकारी मंजुश्री यांनी फिर्याद दिली होती. या खटल्यात कार्यकर्त्यांच्यावतीने अॅड. महेश बिर्जे, अॅड. एम. बी. बोंद्रे, अॅड. बाळासाहेब कागणकर हे काम पाहत आहेत.