बेळगाव प्रिमियर लिग टेनिस बॉल क्रिकेट स्पर्धा : रोहित पाटील, करण बोकडे, साकिब बेपारी सामनावीरचे मानकरी
बेळगाव : अर्जुन स्पोर्ट्स क्लब आयोजित बेळगाव प्रिमियर लिग टेनिस बॉल क्रिकेट स्पर्धेच्या रविवारी खेळविण्यात आलेल्या शेवटच्या साखळी सामन्यात एसआरएस हिंदुस्थान संघाने साई बॉईज हिंडलगा संघाचा 10 गड्यांनी तर केआर शेट्टी किंग्ज संघाने सरकार स्पोर्ट्स गांधीनगर संघाचा 7 गड्यांनी तर एवायसीने शिवनेरीचा 7 गड्यांनी पराभव करुन उपांत्य फेरीत प्रवेश केला. रोहित पाटील, करण बोकडे व साकिब बेपारी यांना सामनावीर पुरस्कार देण्यात आला. पहिल्या सामन्यात साई इंडियन बॉईज हिंडलगा संघाने प्रथम फलंदाजी करताना 8 षटकात 4 गडी बाद 60 धावा केल्या. त्यात कर्णधार तनिष्क नाईकने 1 षटकार, 4 चौकारांसह 38, सुशांत कडोलकरने 11 धावा केल्या. एसआरएसतर्फे रोहित पाटील व फयाज सिद्दकी यांनी प्रत्येकी 1 गडी बाद केला. प्रत्युत्तरादाखल खेळताना एसआरएस संघाने 6.1 षटकात बिनबाद 62 धावा करुन सामना 10 गड्यांनी जिंकला. त्यात कर्णधार रोहित पाटीलने 3 उत्तुंग षटकारांसह 20 चेंडूत नाबाद 36, प्रसाद नाकाडीने 2 चौकारांसह नाबाद 19 धावा केल्या.
दुसऱ्या सामन्यात सरकार स्पोर्ट्स गांधीनगर संघाने प्रथम फलंदाजी करताना 8 षटकात 9 गडी बाद 40 धावा केल्या. त्यात गणेशने 2 चौकारांसह 15 तर कर्णधार पार्थ पाटील व पाशा रोहिले यांनी प्रत्येकी 10 धावा केल्या. केआर शेट्टी किंग्जतर्फे करण बोकडेने हॅट्ट्रीकसह 4 धावात 6 गडी बाद करीत निम्म्याहून अधिक संघ गारद केला. त्यात विशाल गौरगौंडा 12 धावात 2 तर किरण तारळेकरने 1 गडी बाद केला. प्रत्युत्तरादाखल खेळताना केआर शेट्टी किंग्जने 4.5 षटकात 3 गडी बाद 43 धावा करुन सामना 7 गड्यांनी जिंकला. त्यात मदन बेळगावकरने 1 षटकारासह 13, केदारनाथ उसूलकर व परशुराम गुरव यांनी प्रत्येकी 1 षटकारासह 10 धावा केल्या. सरकार गांधीनगरतर्फे पार्थ पाटीलने 19 धावात 2, स्वयम अप्पण्णावरने 1 गडी बाद केला. तिसऱ्या सामन्यात मोहन मोरे संघ न आल्यामुळे स्पोर्ट्स ऑन संघाला पुढे चाल देण्यात आली.
चौथ्या सामन्यात शिवनेरी लायन्सने प्रथम फलंदाजी करताना 8 षटकात 7 गडी बाद 52 धावा केल्या. त्यात निशांक भीमाने 2 षटकार, 3 चौकारांसह 33 धावा केल्या. एवायसीतर्फे शफीकने 6 धावात 4 तर विनोद तावले व ओंकार वेर्णेकर यांनी प्रत्येकी 1 गडी बाद केला. प्रत्युत्तरादाखल खेळताना एवायसीने 5 षटकात 3 गडी बाद 54 धावा करुन सामना 7 गड्यांनी जिंकला. त्यात शफीकने 1 षटकार, 2 चौकारांसह 21, चेतन पांगिरेने 1 षटकार, 2 चौकारांसह 18, विनोद तावलेने 1 षटकार, 1 चौकारासह 13 धावा केल्या. शिवनेरीतर्फे शंकर, अजित व नामदेव गुरव यांनी प्रत्येकी 1 गडी बाद केला. सामन्यानंतर प्रमुख पाहुणे मंजूर शेख, गणेश कंग्राळकर, अमरदीप पाटील, सुजित शिंदोळकर, विकास चौगुले यांच्या हस्ते साकिब बेपारी, रोहित पाटील, करण बोकडे यांना सामनावीर तर भीमा तलवार, पार्थ पाटील, तनिष्क नाईक यांना इम्पॅक्ट खेळाडू म्हणून चषक देऊन गौरविण्यात आले. सोमवारी पहिला उपांत्य सामना एवायसी विरुद्ध केआर शेट्टी किंग्ज यांच्यात सकाळी 9 वाजता तर दुसरा उपांत्य फेरीचा सामना स्पोर्ट्स ऑन विरुद्ध एसआरएस हिंदुस्थान यांच्यात सकाळी 11 वाजता खेळविण्यात येणार आहे. दुपारी अंतिम सामना खेळविण्यात येणार असून त्यानंतर बक्षीस वितरण होणार आहे.
