पं. कमलाकर नाईक,पं. रामराव नायक यांना पुरस्कार

फोंडा : गोवा संगीत महाविद्यालयाचे निवृत्त प्राचार्य व आग्रा घराण्याचे बुजुर्ग गायक पं. कमलाकर नाईक यांना पं. विष्णू दिगंबर पलुस्कर स्मृती संगीतरत्न पुरस्कार तर ग्वाल्हेर व किराणा घराण्याचे ज्येष्ठ गायक पं. रामराव नायक यांना महामहोपाध्याय पुरस्कार देऊन सन्मानित करण्यात आले. अखिल भारतीय गांधर्व महाविद्यालयातर्फे संगीताचार्य विष्णू दिगंबर पलुस्कर यांच्या 150 व्या जयंतीनिमित्त संगीत क्षेत्रात भरीव योगदान दिलेल्या देशभरातील दिडशे संगीत कलाकारांना हा पुरस्कार जाहीर करण्यात आला होता. वाशी मुंबई येथे नुकताच हा पुरस्कार वितरण सोहळा पार पडला. या सोहळ्यात पं. कमलाकर नाईक व पं. रामराव नायक या दोघा गोमंतकीय सुपूत्रांना हा पुरस्कार बहाल करण्यात आला. कार्यक्रमाला मुंबई महानगरपालिकेचे आयुक्त राजेश नार्वेकर, प्रा. बाळासाहेब सुर्यवंशी, डॉ. देवेंद्र कुलकर्णी, डॉ. सुधाकर चव्हाण, डॉ. पुरू दधिच आदी मान्यवर उपस्थित होते.