आचरा : प्रतिनिधी
आचरा येथील माजी शिक्षक सुरेश ठाकूर यांना जाहीर झालेला छात्र प्रबोधन मंडळ सावंतवाडीचा कै. वसंतराव गोविंदशेठ केसरकर स्मृती आदर्श शिक्षक पुरस्कार नुकताच त्यांच्या निवासस्थानी प्रदान करण्यात आला. या छात्र प्रबोधन मंडळाच्या कार्यकर्त्यांनी शाल, श्रीफळ, पुष्पगुच्छ, मानपत्र, सन्मानचिन्ह आणि रोख रुपये पाच हजार देऊन असे त्यांना सन्मानित केले यावेळी भरत गावडे (सदस्य महाराष्ट्र राज्य नवीन शैक्षणिक धोरण सुकाणू समिती), विकास गोवेकर, अरविंद सरनोबत, लक्ष्मणराव राणे (माजी सैनिक) आदी छात्र प्रबोधन मंडळाचे कार्यकर्ते उपस्थित होते. तसेच या घरगुती सत्कार सोहळ्यास सौ. वीणा ठाकूर, सतीश ठाकूर, सौ. छाया ठाकूर, सौ. साक्षी ठाकूर, सौ. रुची ठाकूर, सीमा यशवंत ठाकूर आदी ठाकूर कुटुंबीय उपस्थित होते.
सत्कार प्रसंगी बोलताना ज्येष्ठ साहित्यिक, माजी शिक्षक सुरेश ठाकूर म्हणाले की “मला शैक्षणिक क्षेत्रात ४० वर्षे सेवा करीत असताना अनेक मानाचे पुरस्कार लाभले. सेवानिवृत्तीनंतर गेली दहा वर्षे कथामाला आणि कोकण मराठी साहित्य परिषदेचे मालवण तालुकाध्यक्ष म्हणून कार्य करीत असतानाही दिग्गज मान्यवरांकडून गौरव झाला. पण आज ‘छात्र प्रबोधन मंडळ’ सावंतवाडी ह्या संस्थेचा कै. वसंतराव गोविंदशेठ केसरकर स्मृती पुरस्कार छात्र प्रबोधन मंडळाच्या कार्यकर्त्यांनी माझ्या घरी आचरेत येऊन मला प्रदान केला. त्याचे मोल मला शब्दात व्यक्त करता येणार नाही. “सदरचा पुरस्कार माझा उत्साह वाढविणारा आहे. यातील रु.५०००/ रकमेत माझे एक हजार एकशे अकरा रुपये घालून हा निधी मी साने गुरुजी कथामाला मालवणच्या कथाकथन शिबिरासाठी खर्च करणार असल्याचे त्यांनी सांगितले.
सदर पुरस्कार प्रसंगी संस्थेचे भरत गावडे म्हणाले,आज सेवानिवृत्त झाल्यावरही शैक्षणिक, सामाजिक, सांस्कृतिक कार्यात सदैव झोकून काम करणाऱ्या ठाकूर गुरुजींना पुरस्कार प्रदान करीत असताना आम्हा सर्व छात्र प्रबोधन मंडळाच्या कार्यकर्त्यांना अत्यानंद होत आहे. विकास गोवेकर यांनी सदर पुरस्काराची पार्श्वभूमी विषद केली. जवळ जवळ गेली ४० वर्षे सुरेश ठाकूर यांचे कार्य आपण जवळून अनुभवले, असे ते म्हणाले. यावेळी छात्र प्रबोधन मंडळ सावंतवाडीच्या वतीने अरविंद सरनोबत यांनी सर्वांचे आभार मानले. तर ठाकूर कुटुंबियांच्या वतीने समीर ठाकूर यांनी छात्र प्रबोधन मंडळाचे आभार मानले.
