तिजोरी न तुटल्यामुळे रोख रक्कम व ऐवज जैसे थे,
वार्ताहर/ पुसेसावळी
खटाव तालुक्यातील वडगाव (ज. स्वा) येथे मध्यरात्रीच्या सुमारास सातारा जिल्हा मध्यवर्ती बॅँकेच्या (शाखा वडगाव) साईडच्या बाजुला असणाऱया खिडकीचे ग्रिल तोडून चोरटय़ांनी बँकेत प्रवेश केला. परंतु तिजोरी न तुटल्यामुळे रोख रक्कम व ऐवज जैसे थे असल्यामुळे बँक अधिकारी व ठेवीदारांचा जीव भांडय़ात पडला आहे.
शनिवारी रात्री एक ते दिडच्या सुमारास जिल्हा मध्यवर्ती बँकेत प्रवेश करुन सी.सी.टिव्हीचे कॅमेरे बंद करुन तिजोरी फोडण्याचा प्रयत्न करत होते. परंतु बँकेतील भोंग्याचा आवाज आल्यामुळे व संबधित अधिकाऱयांना मोबाइलद्वारे मेसेज गेल्यामुळे गावातील ग्रामस्थ बॅँकेजवळ आले. त्यामुळे चोरटय़ांना गावातील ग्रामस्थ जागे झाले असल्याचा सुगावा लागल्यामुळे चोरटे तिजोरी न फोडता पसार झाले. ग्रामस्थांच्या जागृतीमुळे चोराचा चोरीचा बेत फसला असल्याची चर्चा घटनास्थळी होती.
या बँकेशी निगडित असणाऱया शेतकरी व ठेवीदारांचे धाबे दणाणले आहेत. शेतकऱयांशी निगडित असणारी ही बँक असल्यामुळे सर्व शेतकऱयांचे या बँकेशी आर्थिक व्यवहार होत असतात. तरी अनेक शेतकऱयांची उसाची बिलेही या बँकेत जमा झालेली आहेत. त्यात गावात बॅँक असल्याने सर्व आर्थिक व्यवहारासाठी सोयीचे असल्यामुळे ग्राहक शेतकरी वर्गाचे या बँकेत आपले पैसे ठेवलेले आहेत.
या पडलेल्या दरोडय़ामुळे येथील नागरिकांमध्ये भितीचे वातावरण निर्माण झालेले आहे. पोलीस प्रशासनाबरोबर बँक प्रशासनाकडूनही सुरक्षेच्या दृष्टीने सतर्क राहणे गरजेचे आहे. तरी ग्रामीण भागातील शाखांमध्ये बँक प्रशासनाने सुरक्षारक्षक नेमणे ही काळाची गरज आहे. घटनास्थळी औंध पोलीस स्टेशनचे अधिकारी दाखल झाले होते. या दरोडय़ाचा उलगडा पोलिसांनी लवकरात लवकर करावा असे ग्रामस्थांकडून बोलले जात आहे.
