खांडोळ येथे घराचे छप्पर उडाले, बेतकी आरोग्य केंद्रावर झाड कोसळले

माशेल : राज्यात मुसळधार सुरू असलेल्या पावसामुळे माशेल, खांडोळा, बेतकी भागाला वादळाचा जबरदस्त तडाखा बसला. पहाटे साडेतीनच्या सुमारास झालेल्या वादळात मोठया प्रमाणात झाडांची पडझडीच्या घटना घडल्या. गांवकरवाडा खांडोळा येथील नागेश रमेश भोसले यांच्या घराचे छप्पर उडाले तर बेतकी आरोग्य केंद्राजवळील झाड उन्मळून कार्यालयाच्या छप्परावर स्थिरावल्याची घटना घडली. बेतकी खांडोळा येथील आरोग्यकेंद्रासमोरील भले मोठे झाड उन्मळून पडून कार्यालयाच्या छप्परावर स्थिरावलेले आहे. हळदोणवाडा येथे एका घरावर झाडाच्या फांद्या पडल्याने नुकसानी झाली.आरोग्य केंद्राच्या कार्यालयावर स्थिरावलेले  झाड प्राधान्यक्रमाने हटविण्यासाठी अग्निशामक दलाचे कर्मचारी घटनास्थळी दाखल झाले होते. तसेच अनेक ठिकाणी रस्त्यावर कोसळलेली झाडे अग्निशामक दलाने हटवून रस्ता वाहतूकीसाठी मोकळा करण्याचे महत्वाचे मदतकार्य केले आहे.