पुणे / वार्ताहर :
ठेकेदाराकडून 50 हजारांची लाच स्वीकारताना महावितरणच्या सहायक अभियंत्याला रंगेहात अटक करण्यात आली. रवींद्र नानासाहेब कानडे (वय 37) असे लाचखोर अधिकाऱ्याचे नाव आहे.
तक्रारदार हे सरकारी विद्युत ठेकेदार आहेत. त्यांना आर. एम. सी. प्लांटसाठी लागणाऱ्या विद्युत पुरवठय़ाचा ठेका मिळाला होता. हे काम शासकीय योजनेच्या 1. 3 टक्के तत्वाच्या नियमानुसार त्यांनी पूर्ण केले होते. या कामाच्या पूर्णत्वाचा दाखल देण्यासाठी सहायक अभियंते कानडे यांनी 50 हजारांची मागणी केली होती. तक्रारदाराने याबाबत तक्रार दिल्यानंतर बाणेर येथील महावितरणच्या उपकेंद्र कार्यालयात सापळा रचून कानडे यांना 50 हजारांची लाच घेताना रंगेहात पकडण्यात आले.
कानडे यांच्यावर चतुश्रृंगी पोलीस ठाण्यात गुन्हा दाखल करण्यात आला आहे. पोलीस अधीक्षक अमोल तांबे, अतिरिक्त पोलीस अधीक्षक डॉ. शीतल जानवे यांच्या मार्गदर्शनाखाली पथकाने ही कारवाई केली.
