सीमाप्रश्नी कायदेशीर समन्वयकपदी आशुतोष कुंभकोणी

बेळगाव : सीमाप्रश्नाच्या खटल्याला गती मिळून महाराष्ट्र सरकार व ज्येष्ठ वकिलांमध्ये समन्वय साधता यावा, यासाठी महाराष्ट्र सरकारचे माजी महाभियोक्ता आशुतोष कुंभकोणी यांची कायदेशीर समन्वयकपदी नियुक्ती महाराष्ट्र सरकारने केली आहे. तसे पत्र मध्यवर्ती म. ए. समितीला पाठविले असल्याने सीमाप्रश्नाच्या खटल्याला बळ मिळणार आहे. मागील दोन वर्षांपासून सीमाप्रश्नाच्या खटल्याला गती मिळावी यासाठी दाव्याची माहिती असलेल्या व्यक्तीची नेमणूक करावी, अशी मागणी होत होती. सीमाप्रश्नाच्या दाव्याबाबत होणाऱ्या घडामोडी महाराष्ट्र सरकारपर्यंत पोहोचाव्यात व त्यांच्याबरोबर समन्वय साधता यावा, यासाठी आशुतोष कुंभकोणी यांच्या नियुक्तीची मागणी मध्यवर्ती म. ए. समितीने केली होती. याची दखल घेऊन महाराष्ट्र सरकारने ही नियुक्ती केली आहे.