दैवाने दिले…पेन्शन फंडात टाकले

भाग्य फळफळले तर बसल्या जागी यशाचे घवघवीत माप पदरात पडते. सध्या सोशल मिडियावर अशाच एका माणसाची सत्यकथा प्रचलित आहेत. या माणसाला सात वर्षांपूर्वी 1 कोटी डॉलर्सची लॉटरी लागली. सर्वसाधारणपणे अशी मोठ्या रकमेची लॉटरी लागल्यानंतर माणसे आनंद साजरा करतात. महागड्या वस्तू खरेदी करतात. घर आणि कारगाड्या घेतात. मित्र आणि कुटुंबियांना पार्टी वगैरे देतात. पण या व्यक्तीने यापैकी काहीच केले नाही. इतकेच नव्हे, तर ही आनंदाची वार्ता या व्यक्तीने स्वत:च्या पत्नीलाही जवळपास वर्षभर सांगितली नाही. ही सर्व रक्कम त्याने आपल्या निवृत्तीवेतन निधीत जमा करुन टाकली. आता या व्यक्तीची ही माहिती मोठ्या प्रमाणात प्रसिद्ध झाली आहे. लोकांना त्याला लॉटरी लागली याचे विशेष आश्चर्य वाटत नाही. कारण अशा अनेक लॉटरी कंपन्या आहेत, की ज्या सातत्याने अशा मोठ्या रकमेच्या लॉटऱ्या बाजारात आणत असतात आणि त्या कोणाला ना कोणाला लागत असतातच. पण या व्यक्तीने ही सर्व रक्कम काहीही खर्च न करता आणि कोणत्याही प्रकारे आनंद साजरा न करता, निवृत्तीवेतन निधीत टाकली याचे लोकांना फारच आश्चर्य वाटत आहे. हा एक ‘बोअरिंग’ मनुष्य आहे, अशा कोमेंटस् त्याच्यासंबंधी केल्या जात आहेत. तसेच, एवढ्या मोठ्या रकमेची लॉटरी लागली असताना वृद्धापकाळाची एवढी चिंता या माणसाला का सतावते, असाही प्रश्न विचारला जात आहे. या माणसाच्या जागी आपण असतो तर या पैशाचे काय केले असते, याचीही चर्चा अनेकजण करीत आहेत.