पेडणे पोलिसांच्या नोटिसीला अरविंद केजरीवाल यांचे आव्हान

पणजी : निवडणुकीसाठी पोस्टर्स लावून सार्वजनिक मालमत्ता विद्रूप केल्याप्रकरणी पेडणे पोलिसांनी जारी केलेल्या नोटिसीला ‘आप’चे नेते व दिल्लीचे मुख्यमंत्री अरविंद केजरीवाल यांनी उच्च न्यायालयात आव्हान दिले आहे. पेडणे पोलिसांनी केजरीवाल यांना 27 एप्रिल रोजी चौकशीसाठी हजर राहाण्याची नोटीस बजावली आहे. त्यास आव्हान देताना केजरीवालच्या वकिलांनी न्यायालयाच्या एकेरी खंडपीठाकडे याचिका सादर केली, पण ती विभागीय खंडपीठाकडे (डिव्हीजन बेंच) सादर करणे आवश्यक असल्याचे सांगून एकेरी खंडपीठाने नाकारली. त्यानुसार ती विभागीय खंडपीठाकडे सादर करण्यात आली असून त्यावर आज बुधवारी सुनावणी होण्याची शक्यता आहे. गोव्यात 2022 मध्ये झालेल्या विधानसभा निवडणुकीत ‘आप’ पक्षातर्फे विविध ठिकाणी सार्वजनिक मालमत्तेवर पोस्टर्स लावण्यात आले होते. मालमत्ता विद्रुपीकरण कायद्याखाली त्याची तक्रार पेडणे पोलिसांत नोंद करण्यात आली आणि चौकशीसाठी केजरीवाल यांनी प्रत्यक्ष हजर राहून सहकार्य करावे, अशी नोटीस बजावण्यात आली. त्यास आव्हान दिल्यामुळे आता न्यायालय काय सांगते यावरच केजरीवाल पेडणे पोलिसांसमोर हजर राहणार की नाही ते ठरणार आहे.