मुख्यमंत्र्यांच्या उपस्थितीतील बैठकीत निर्णय : आमदार प्रकाश आबिटकर यांची माहिती
प्रतिनिधी/कोल्हापूर
राधानगरी विधानसभा मतदार संघातील डोंगराळ गावे समृध्द करण्यासाठी मुख्यमंत्री एकनाथ शिंदे यांच्या अध्यक्षतेखाली मंत्रालयात गुरुवारी झालेल्या बैठकीत जलसंधारण विभागाच्या 9 सिंचन योजनांसह 10 पाझ्र तलावांच्या दुरुस्ती प्रस्तावांना तात्काळ प्रशासकिय मान्यता देण्यात आली. तर प्रस्तावित उपसा सिंचन योजना, लघु पाटबंधारे योजना, पाझर तलाव व कोल्हापूरी पध्दतीचे बंधारे कामांचे सर्वेक्षण व अंदाजत्रक तयार करण्याकरीता सुमारे 590 कोटी रुपयांच्या कामांना तत्वता मंजुरी देण्यात आली आहे, अशी माहिती आमदार प्रकाश आबिटकर यांनी प्रसिध्दीपत्रकाद्वारे दिली.
मुंबईत मुख्यमंत्र्यांच्या अध्यक्षतेखाली बैठक आयोजित करण्यात आली होती. यावेळी आमदार प्रकाश आबिटकर, मुख्य सचिव मुनुकुमार श्रीवास्तव, मुख्यमंत्री यांचे अपर मुख्य सचिव भुषण गगराणी, जलसंधारण प्रधान सचिव एकनाथ डवले, वित्त विभागाचे प्रधान सचिव ए. शैला, जलसंपदाचे सचिव श्विलास रजपुत, जलसंधारण महामंडळाचे कार्यकारी संचालक सुनिल कुशिरे, मुख्य अभियंता ख. वी. गुणाले, ‘सिडीओ’चे मुख्य अभियंता प्रमोद मांदाले, मुख्य अभियंता अतुल कपोले, कोल्हापूरचे अधिक्षक अभियंता महेश सुर्वे, कार्यकारी अभियंता बाळासाहेब आजगेकर आदी उपस्थित होते.
आ. आबिटकर म्हणाले, उपसा जलसिंचन योजनांचे सर्वेक्षण करण्याचा हा शासनाचा जिल्हयातील पहिलाच प्रयोग आहे त्यामुळे राधानगरी मतदारसंघातील डोंगराळ भागातील हजारो हेक्टर शेती ओलीताखाली येणार आहे. राधानगरी, भुदरगड व आजरा तालुक्यांमध्ये मोठया प्रमाणात पाऊस पडतो, मात्र या पावसाचे पाणी वाहून जाते. परिणामी डोंगराळ भागातील या गावांना पाण्याचा लाभ होत नसल्यामुळे या गावांचा शेतीच्या व पिण्याचा पाण्याचा प्रश्न निर्माण झालेला होता. हा प्रश्न निकालात काढण्यासाठी गेली 2 ते 3 वर्षे सातत्याने पाठपुरावा सुरु होता. या पार्श्वभूमीवर गुरुवारी मुंबईत मुख्यमंत्री शिंदे यांच्या अध्यक्षतेखाली आयोजित बैठकीत हा प्रश्न निकाली निघण्याचा मार्ग सुकर झाला आहे.
यामध्ये प्रामुख्याने नवरसवाडी, पाल बुद्रुक, मठगांव, पंडीवरे, दुर्गमानवाड, दिंडेवाडी, बसरेवाडी, मिणचे खुर्द या सिंचन योजनांसाठी 57.99 कोटी, 10 पाझर तलावांच्या दुरुस्तीकरीता 4.85 कोटी रुपयांना तात्काळ मंजूरी देण्यात आली. तर राधानगरी तालुक्यातील वाकीघोल, एwनी हुडा, दुर्गमानवाड, बनाचीवाडी, पाटपन्हाळा, चक्रेश्वरवाडी, धामनणवाडी, पिंपळवाडी, नरतवडे भुदरगड तालुक्यातील बसुदेव भुजाई (मिणचे खोरा), मुदाळ-कुर-नाधवडे, पाल, भुदरगड किल्ला, देवकेवाडी अशा 15 उपसा सिंचन योजनांच्या 266 कोटी रुपयांच्या कामांचे तात्काळ सर्वेक्षण करण्याचे व अंदापत्रक सादर करण्याचे मुख्यमंत्री यांनी निर्देष दिले असून या कामांच्या सर्वेक्षणाकरीता 6.81 कोटी रुपयांची रक्कमेची तरतुद केली आहे.
लघु पाटबंधारे योजनांच्या कामाच्या सर्वेक्षणासाठी 98 लाखाची तरतुद
10 लघु पाटबंधारे यांजनांच्या 167 कोटी रुपयांच्या कामांचे सर्वेक्षण व अंदापत्रक करण्याकरीता 98.00 लाख रुपयांचे तरतुद करण्यात आली आहे. तसेच 42 पाझर तलावांच्या 72.12 कोटी रु. कामांचे सर्वेक्षण व अंदापत्रक करण्याकरीता 80.00 लाख रुपयांची तरतुद व 48 कोल्हापूरी पध्दतीच्या बंधायांच्या 40.52 कोटी रुपयांचे कामांचे सर्वेक्षण व अंदापत्रक करण्याकरीता 60.00 लाख रुपयांच्या निधीची तरतुद करण्यात आली आहे.
‘मेघोली’ साठी 40 कोटी रुपयांची तरतुद
मेघोली लघु पाटबंधारे प्रकल्प फुटल्यामुळे या लाभ क्षेत्रातील गावांचा पिण्याचा व सिंचनाचा प्रश्न गंभीर बनला आहे. त्यामुळे या प्रकल्पासाठी 40.00 कोटी रुपयांची तरतुद करण्यात आली आहे. प्रकल्पाचे काम तात्काळ सुरु करण्याकरीता जलसंपदा विभाग व जलसंधारण विभागाने समन्वय साधुन प्रकल्पाचे संकल्पचित्र पुढील 15 दिवसांमध्ये सादर करुन 1 महिन्यांमध्ये निविदा प्रसिध्द करणेबाबत कार्यवाही करण्याबाबतचे आदेश मुख्यमंत्र्यांनी दिले.
