दिल्लीच्या तिहार तुरुंगात कैद्यांदरम्यान पुन्हा टोळीयुद्ध

नवी दिल्ली : राष्ट्रीय राजधानी दिल्ली येथील तिहार तुरुंगात कैद्यांदरम्यान पुन्हा एकदा टोळीयुद्ध झाले असून यात 21 कैदी जखमी झाले आहेत. तिहार तुरुंग क्रमांक-8 मध्ये कैद्यांमध्ये संघर्ष झाला आहे. यादरम्यान झालेल्या मारहाणीत हे कैदी जखमी झाल्याची माहिती तुरुंग प्रशासनाकडून देण्यात आली आहे. कैद्यांच्या हालचालींवर नजर ठेवण्यासाठी तिहारमध्ये अनेक सीसीटीव्ही कॅमेरे लावण्यात आले आहेत. तरीही अशाप्रकारच्या घटना तेथे घडत आहेत. सुरक्षेच्या दृष्टीकोनातून तिहार तुरुंगांतील वॉर्डांना तीन श्रेणींमध्ये विभागण्यात आले आहे. एकूण 975 कॅमेऱ्यांद्वारे तुरुंगावर नजर ठेवली जात आहे. तसेच 80 अधिकाऱ्यांसोबत 1 हजाराहून अधिक सुरक्षारक्षक तेथे तैनात आहेत. तिहार तुरुंगात यापूर्वी गँगस्टर सुनील उर्फ टिल्लू ताजपुरियाची हत्या करण्यात आली होती. त्यापूर्वी एप्रिल महिन्यात कैदी प्रिन्स तेवतियाची हत्या करण्यात आली होती.