शिवसेनाप्रमुख बाळासाहेब ठाकरे यांच्या जयंतीनिमित्त शिवसेना प्रमुख ठाकरे गट उद्धव ठाकरे यांनी आणि त्यांच्या कुटुंबियांनी बाळासाहेब ठाकरे याच्या पुतळ्याला अभिवादन केले. यावेळी उद्धव ठाकरे, आदित्य ठाकरे, तेजस ठाकरे यांनी बाळासाहेबांच्या पुतळ्याला पुष्पहार अर्पण करून अभिवादन केले. यावेळी रश्मी ठाकरे, सुभाष देसाई, भास्कर जाधव, यांच्यासह शिवसेनेचे नेते उपस्थित होते. तर मुख्यमंत्री एकनाथ शिंदे यांनीही शिवसेनाप्रमुखांना पुष्पहार अर्पण करून अभिवादन केले.
शिवाजीपार्काजवळ असलेल्या बाळासाहेब ठाकरे यांच्या स्मारकाला न जाता ठाकरे कुटुंबियांनी रिगल सिनेमाजवळील पुर्णाकृती पुतळ्याचे दर्शन घेतले. यावेळी बाळासाहेब ठाकरे यांच्या नावाचा कार्यकर्त्यांनी जयजयकार केला. घोषणांनी परिसर आणि ढोल- ताशांचा गजराने वातावरण ढवळून निघाले होते.
दरम्यान, विधानभवनात शिवसेनाप्रमुख बाळासाहेब ठाकरे यांच्या बहुचर्चित तैलचित्राचे अनावरण झाले. या कार्यक्रमासाठी उद्धव ठाकरे उपस्थित राहणार नसल्याचे आधीच जाहीर होते. तर मनसे प्रमुख राज ठाकरे यांच्या प्रमुख उपस्थितीमध्ये विधानभवनात या तैलचित्राचे अनावरण झाले.
मुख्यमंत्री एकनाथ शिंदे यांनीही शिवसेनाप्रमुख बाळासाहेब ठाकरे यांना विनम्र अभिवादन केले. डॉ.शामाप्रसाद मुखर्जी चौकातील बाळासाहेबांच्या पुर्णाकृती पुतळ्यास त्यांनी पुष्पहार अर्पण केला. यावेळी शालेय शिक्षणमंत्री दीपक केसरकर, उत्पादन शुल्क मंत्री शंभुराज देसाई उपस्थित होते.
