अंजली निंबाळकर यांना पारिश्वाड भागाचा भक्कम पाठिंबा

खानापूर : तालुक्याचा विकास हेच माझे ध्येय असून तालुक्याच्या सर्वांगीण विकासासाठी गेल्या पाच वर्षांत सातत्याने प्रयत्नशील होते. या प्रयत्नांना बऱ्यापैकी यश आले आहे. उर्वरित विकास पुढील पाच वर्षांत करण्याचा माझा संकल्प आहे. पारिश्वाड भागासाठी मी गेल्या पाच वर्षांत विविध विकासकामांची पूर्तता केली आहे. यात दवाखाना, रस्ते, जलसिंचन यासह इतर विकासकामांना प्राधान्य दिले आहे. माझ्या विकासकामाकडे बघून पारिश्वाड परिसरातील मतदारांनी मला भरघोस मतांनी विजयी करावे आणि खानापूर तालुक्याच्या सेवेची संधी द्यावी, असे आवाहन पारिश्वाड येथील कोपरा सभेवेळी अंजली निंबाळकर यांनी केले. यावेळी काँग्रेसचे नेते मल्लिकार्जुल वाली, चंब्बाण्णा होसमणी यासह काँग्रेसचे विविध पदाधिकारी उपस्थित होते. पारिश्वाड येथे रविवारी सायंकाळी आमदार अंजली निंबाळकर यांची पदयात्रा काढण्यात आली. यावेळी काँग्रेसच्या कार्यकर्त्यांनी व पारिश्वाडवसियांनी निंबाळकर यांचे भव्य स्वागत केले. निंबाळकरांवर पुष्पवृष्टी करत पदयात्रा काढण्यात आली. यावेळी कार्यकर्ते व पारिश्वाडवासियांनी निंबाळकरांच्या पाठीशी खंबीरपणे उभे राहण्याचे आश्वासन दिले. तसेच पारिश्वाड परिसरातून काँग्रेसला मताधिक्य देवू, असे जाहीर केले.