सुरेश गडकरी चषक क्रिकेट स्पर्धा
बेळगाव : आनंद क्रिकेट अकादमी आयोजित चौथ्या सुरेश गडकरी चषक 13 वर्षांखालील आंतर कॅम्प लेदरबॉल क्रिकेट स्पर्धेत उद्घाटन दिवशी आनंद अकादमी, बेळगाव स्पोर्ट्स क्लब संघांनी आपल्या प्रतिस्पर्ध्यांवर मात करुन प्रत्येकी 2 गुण मिळविले. साहील तलवार व पवन मालशेट यांना सामनावीर पुरस्कार देण्यात आला. भगवान महावीर मैदानावर आयोजित सुरेश गडकरी, आनंद करडी, दर्शन गडकरी, जयंत नार्वेकर, अजित कुलकर्णी, नागेश सुतार आदी मान्यवरांच्या हस्ते यष्टीचे पूजन करुन उद्घाटन झाले. या स्पर्धेत आनंद अकादमी अ व ब, रॉजर क्रिकेट क्लब, के. आर. शेट्टी लायाज, एसकेई, बेळगाव स्पोर्ट्स क्लब, एमसीसीसी व साही दुर्गा स्पोर्ट्स अकादमी हुबळी या संघांनी सहभाग घेतला आहे. उद्घाटन सामन्यात आनंद अकादमीने प्रथम फलंदाजी करताना 25 षटकात 8 गडी बाद 185 धावा केल्या.
अराध्या तुडयेकरने 7 चौकारांसह 47, स्वराज्य गोवेकरने 17, श्रीजीत चोपडेने 16, साईवंश येळ्ळूरकरने 14 धावा केल्या. एमसीसीसीतर्फे शिवम उदगट्टीने 3 तर विठ्ठल व समृद्ध यांनी प्रत्येकी 1 गडी बाद केला. प्रत्युत्तरादाखल खेळताना एमसीसीसीने 25 षटकात 1 गडी बाद 183 धावा केल्या. हा सामना केवळ 2 धावांनी गमवावा लागला. अर्णव मंडोळकरने 9 चौकारांसह 66 तर पवन मालशेटने 6 चौकारांसह 72 धावा केल्या. दुसऱ्या सामन्यात बेळगाव स्पोर्ट्स क्लबने 25 षटकात 5 गडी बाद 295 धावा केल्या. त्यात सचिन तलवारने 32 चौकारांसह नाबाद 188 धावा करुन दमदार दीड शतक झळकविले. तर समर्थ तलवारने 10 चौकारांसह 68 धावा करुन सुरेख साथ दिली. के. आर. शेट्टी लायाजतर्फे मंदार के.ने 2 तर निखिलने 1 गडी बाद केला. प्रत्युत्तरादाखल खेळताना के. आर. शेट्टी संघाने 25 षटकात 3 गडी बाद 116 धावाच केल्या. त्यात अथर्व एम.ने 4 चौकारांसह 24 तर आरुष पाटीलने 20 धावा केल्या. बेळगाव स्पोर्ट्स क्लबतर्फे दिगंत वालीने 2 तर उत्कर्षने 1 गडी बाद केला.
