अभयकुमार करडी चषक क्रिकेट स्पर्धा
बेळगाव : आनंद अकादमी आयोजित अभयकुमार करडी चषक 16 वर्षाखालील क्रिकेट स्पर्धेत आनंद अकादमी संघाने डीसीए संघाचा 7 गडय़ांनी पराभव करून विजयी सलामी दिली. तनिष्क जैनला सामनावीर पुरस्कार देण्यात आला.
भगवान महावीर जैन स्कूल भुतरामट्टी येथे आयोजित स्पर्धेच्या उद्घाटन प्रसंगी प्रमुख पाहुणे व्ही. आर. गुलीहळ्ळी, आनंद करडी, गणेश सुतार, हर्ष पॅट्रॉट, प्रसाद सुगूर, हुरकान मुल्ला आदी मान्यवरांच्या हस्ते यष्टीचे पूजन करण्यात आले. उद्घाटन सामन्यात बीसीए संघाने 24.5 षटकात सर्व बाद 94 धावा केल्या. ओंकार जोशीने 18, अभिषेक बेळगीने 11 धावा केल्या. आनंद अकादमीतर्फे तनिष्क जैनने 10 धावात 2, सुमोघ बडकरने 18 धावात 2 लक्ष वेर्णेकरने 22 धावात 2 गडी बाद केले. प्रत्युत्तरादाखल आनंद अकादमी संघाने 18.1 षटकात 3 बाद 98 धावांसह सामना 7 गडय़ांनी जिंकला. निल पवारने नाबाद 49, सिद्धांत करडीने 23 धावा केल्या. बीसीएतर्फे प्रकाश मादारने 22 धावात 2 गडी बाद केले.
