जमिनीखाली वसलेले हॉटेल

एक नवे हॉटेल जगभरात चर्चेच्या केंद्रस्थानी आहे. हे हॉटेल जमिनीत 1,375 फूट खोलवर तयार करण्यात आले आहे. येथे लक्झरी रुम्स आणि खाण्यापिण्याची पूर्ण सुविधा आहे. याला द डीप स्लीप हॉटेल म्हटले जाते. नॉर्थ वेल्सच्या स्नोडोनिया येथील पर्वतांखाली हे हॉटेल असून या भागाला एरीरी नॅशनल पार्क असे देखील संबोधिले जाते. एप्रिल महिन्यात गो बिलो या कंपनीने हे हॉटेल सुरू केले आहे. या हॉटेलमध्ये वास्तव्य करणाऱ्या ग्राहकांकडून सकारात्मक प्रतिसाद मिळत असल्याचे येथील मॅनेजर माइक मॉरिस यांनी सांगितले आहे. हे जगातील सर्वात खोलवर असलेले हॉटेल असून ते ब्रिटनमध्ये निर्माण करण्यात आले आहे. डीप स्लीप हॉटेलमध्ये चार पर्सनल ट्विन-बेड केबिन आणि डबल बेडसोबत एक रोमँटिक गुहा देखील आहे. आठवड्यात शनिवार रात्रीपासून रविवार सकाळपर्यंत ती उपलब्ध असते. हॉटेलकडून भोजन आणि अनेक प्रकारची हॉट ड्रिंक्स पुरविली जातात. एका पर्सनल केबिनमध्ये दोन लोकांच्या एक रात्रीच्या वास्तव्याचा खर्च 350 पाउंड म्हणजेच 36 हजार रुपये इतका आहे. तर ग्रोटोमध्ये दोन लोकांच्या वास्तव्यासाठी 550 पाउंड इतका खर्च येतो. येथे जाण्यासाठी वेबसाइटवर ऑनलाइन बुकिंग करता येते. या हॉटेलमधील रुम्सपर्यंत पोहोचण्यासाठी अतिथींना एका ट्रिप लीडरसोबत खाणींना ओलांडावे लागते. खाणींखालील प्रवासात प्राचीन जिने आणि जुने पूल सामील आहेत. तासाच्या ट्रेकदरम्यान ट्रिप गाइड ऐतिहासिक माहिती प्रदान करतो. प्रवास करण्यापूर्वी अतिथींना हेल्मेट, लाइट, हार्नेस आणि बूट देखील प्रदान करण्यात येतात.