चिमुरड्याने बनवलं मनाजोगं टाईमटेबल

बालपण हे अत्यंत निरागस अन् तितकेच मजेशीर असते. या वयात कुठल्याही जबाबदारीची चिंता सतावत नसते. बालपणात प्रत्येकाला स्वत:च्या मनानुसार जगण्याचे स्वातंत्र्य असते. परंतु बालपणीच शिस्त लागावी म्हणून आईवडिलांकडून  प्रत्येक गोष्टीसाठी एक टाईमटेबल (वेळापत्रक) ठरविले जाते. यातून मुलांना टाईमटेबल पाळण्याची सवय लहानपणापासूनच लागत असते. या टाईम टेबलमध्ये अभ्यासासाठी अधिक वेळ तर इतर कामांसाठी कमी वेळ ठरवून दिलेला असतो. परंतु एका 6 वर्षीय मुलाने स्वत: तयार केलेले टाईमटेबल पाहून चेहऱ्यावर हास्य उमटल्याशिवाय राहणार नाही. या मुलाने स्वत:च्या टाईमटेबलमध्ये खेळण्यासाठी मोठा वेळ राखून ठेवला आहे, परंतु अभ्यासासाठी केवळ 15 मिनिटे ठरविली आहेत. हे पाहून अनेकांना हसू आवरणे कठिण झाले आहे. या मुलाने सकाळी उठल्यापासून रात्री झोपेपर्यंत काय-काय करायचे हे दर्शविणारे एक टाईमटेबल तयार केले असून ते आता सोशल मीडियावर प्रसिद्ध होत आहे. या वेळापत्रकात या मुलाने अभ्यासासाठी 15 मिनिटे तर आंघोळीसाठी 30 मिनिटांचा कालावधी राखून ठेवला आहे. यात खेळण्यासाठी 1 तास, फायटिंगसाठी 3 तास, दुपारी झोपण्यासाठी सव्वा दोन तास आणि पुन्हा खेळण्यासाठी सव्वा दोन तास अशी वेळ ठरविली आहे. एका ट्विटर युजरने 22 जून रोजी हे टाईमटेबल पोस्टद्वारे शेअर केली आहे. हे टाईमटेबल माझ्या 6 वर्षाच्या चुलत भावाने तयार केले असून त्याने अभ्यासासाठी केवळ 15 मिनिटांची वेळ राखून ठेवली आहे असे याच्या कॅप्शनमध्ये नमूद करण्यात आले आहे. या पोस्टवर आतापर्यंत हजारो लाइक्स अन् कॉमेंट्स प्राप्त झाल्या आहेत.