अज्ञात मोटारसायकलच्या धडकेत कामत गल्लीचा वृद्ध ठार

बेळगाव : अज्ञात मोटारसायकलने ठोकरल्याने कामत गल्ली येथील एका वृद्धाचा मृत्यू झाला. गुरुवारी रात्री कणबर्गी रोडवर हा अपघात घडला आहे. वाहतूक उत्तर विभाग पोलीस स्थानकात या घटनेची नोंद झाली आहे. प्रभाकर नारायण बामणेकर (वय 67) रा. कामत गल्ली असे त्या वृद्धाचे नाव आहे. प्रभाकर हे ऑटोनगरला कामावर गेले होते. रात्री 8.15 वाजण्याच्या सुमारास आपल्या सायकलवरून घरी परतताना कणबर्गी रोडवरील विशाल मार्टजवळ अज्ञात मोटारसायकलची धडक बसून झालेल्या अपघातात ते गंभीर जखमी झाले. त्यांना उपचारासाठी खासगी इस्पितळात दाखल करण्यात आले. उपचारांचा उपयोग न होता शुक्रवारी सकाळी त्या वृद्धाचा मृत्यू झाला. वाहतूक उत्तर विभाग पोलीस स्थानकात या घटनेची नोंद झाली असून सिव्हिल हॉस्पिटलमधील शवागारात उत्तरीय तपासणी करून मृतदेह नातेवाईकांच्या ताब्यात देण्यात आला. प्रभाकर यांच्या पश्चात पत्नी, एक मुलगा, तीन मुली, जावई, नातवंडे असा परिवार आहे. सोमवार दि. 14 रोजी सकाळी कामत गल्ली स्मशानभूमी येथे रक्षाविसर्जन होणार आहे.