सुरक्षा दलाने केला दहशतवाद्याचा खात्मा
वृत्तसंस्था/ श्रीनगर
उत्तर काश्मीरमधील कुपवाडा जिल्ह्यात पुन्हा एकदा घुसखोरीचा प्रयत्न हाणून पाडण्यात भारतीय सैन्याला यश आले आहे. सुरक्षा दलांनी कुपवाडा जिल्ह्यातील जुमागुंड सेक्टरमध्ये नियंत्रण रेषेजवळ घुसखोरीचा प्रयत्न हाणून पाडला. येथे एक दहशतवादी मारला गेला असून रविवारी रात्री उशिरापर्यंत शोधमोहीम सुरू होती.
कुपवाडा पोलीस आणि लष्कराच्या संयुक्त पथकाने जिह्यातील जुमागुंड सेक्टरमध्ये भारत-पाकिस्तान नियंत्रण रेषेवरून घुसखोरी केलेल्या एका दहशतवाद्याचा खात्मा केला आहे. पोलीस आणि लष्करी जवानांनी संयुक्तपणे राबविलेल्या या मोहिमेनंतर अन्य दहशतवाद्यांनी घटनास्थळावरून पोबारा केल्याचे सांगण्यात आले. यापूर्वी गुऊवारी कुपवाडा येथे पोलीस आणि सुरक्षा दलाच्या संयुक्त पथकाने पाच दहशतवाद्यांना ठार केले होते. मारले गेलेले दहशतवादी लष्कर-ए-तोयबाशी संबंधित होते. ते सीमेवरून भारतीय हद्दीत घुसण्याचा प्रयत्न करत असताना सतर्क सैनिकांनी त्यांचा खात्मा केला होता. त्यांच्याकडून मोठ्या प्रमाणात शस्त्रास्त्रे आणि दारूगोळा जप्त करण्यात आला होता. आता पुन्हा त्याच भागात करण्यात आलेला घुसखोरीचा प्रयत्नही भारतीय सैन्याने उधळून लावला आहे.
16 लॉन्चिंग पॅड सक्रीय : डीजीपी
उत्तर काश्मीरच्या कुपवाडा जिल्ह्यातील नियंत्रण रेषेच्या पलीकडे पाकव्याप्त जम्मू आणि काश्मीरमध्ये (पीओजेके) 16 लॉन्चिंग पॅड सक्रीय आहेत. येथे प्रशिक्षित दहशतवादी घुसखोरीसाठी सज्ज आहेत. हे दहशतवादी सतत सीमेपलीकडून घुसखोरीचा प्रयत्न करत असतात, असे वक्तव्य डीजीपी दिलबाग सिंग यांनी केले होते. दहशतवाद्यांच्या तळांवर मोठ्या प्रमाणात प्रशिक्षण शिबिरे राबविण्यात येत आहेत. प्रशिक्षणानंतर दहशतवाद्यांना भारतीय हद्दीत घुसखोरी करण्याचा प्रयत्न चालवला जातो. घुसखोरीचे प्रयत्न यापूर्वीही झाले आहेत आणि आताही केले जात आहेत. पाकिस्तानी एजन्सीकडून असे प्रयत्न केले जातात. मात्र, सतर्क असलेल्या लष्कर आणि पोलिसांकडून दहशतवाद्यांचे प्रयत्न हाणून पाडण्यासाठी सर्वतोपरी प्रयत्न केले जातात, असेही दिलबाग सिंग यांनी स्पष्ट केले होते.
