जीसीएमएमएफ सीओओ जयन मेहता अंतरिम व्यवस्थापकीय संचालक
वृत्तसंस्था/ नवी दिल्ली
‘अमूल’ या ब्रँड नावाने प्रसिद्ध असलेल्या गुजरात कोऑपरेटिव्ह मिल्क मार्केटिंग फेडरेशन लिमिटेड (जीसीएमएमएफ) च्या व्यवस्थापकीय संचालकपदाचा आरएस सोढी यांनी राजीनामा दिला आहे. जीसीएमएमएफचे सीओओ जयन मेहता यांच्याकडे आता हे पद सोपवण्यात आले आहे. मेहता यांच्याकडे केवळ तात्पुरता कार्यभार देण्यात आला आहे, असे अहवालात म्हटले आहे.
वृत्तानुसार, सोमवारी चेअरमन शामलभाई पटेल आणि व्हाईस चेअरमन वलंबाही हुंबळे यांच्या अध्यक्षतेखाली जीसीएमएमएफच्या बैठकीत आरएस सोढी यांचा राजीनामा स्वीकारण्यात आला. जीसीएमएमएफ ही मूळ कंपनी आहे जी अमूल ब्रँड चालवते.
सोढी यांच्या दूरदृष्टीने अमूलला नवी उंची प्राप्त
2010 मध्ये, अमूलची जबाबदारी आरएस सोढी यांच्याकडे गेली, जे गेली 30 वर्षे अमूलशी संबंधित होते. त्यांनी पुरवठा साखळीत काही बदल केले आणि अनेक नवीन उत्पादने बाजारात आणली ज्याने अमूलला पुन्हा रुळावर आणले. इान्स्टिटय़ूट ऑफ रुरल मॅनेजमेंट आनंद (आयआरएमएम) येथून त्यांनी एमबीए केले. 2017 मध्ये सोढी यांना अमूलचे एमडी म्हणून 5 वर्षांची मुदतवाढ देण्यात आली होती. सोढी यांनी त्यांच्या कारकिर्दीला अमूलमध्ये वरिष्ठ व्यवस्थापक सेल्स म्हणून सुरुवात केली. 2000 ते 2004 या कालावधीत त्यांनी अमूल येथे विपणन महाव्यवस्थापक पदाचा कार्यभार सांभाळला. सोढी यांचे पूर्ण नाव डॉक्टर रुपिंदर सिंग सोढी आहे.
इंडियन डेअरी असोसिएशनचे अध्यक्ष होते
सहकार मंत्री अमित शाह यांनी ऑक्टोबर 2022 मध्ये सांगितले होते की, मल्टी स्टेट कोऑपरेटिव्ह सोसायटी तयार करण्यासाठी अमूलचे इतर पाच सहकारी संस्थांमध्ये विलीनीकरण केले जाईल. जुलै 2022 मध्ये, सोढी यांची भारतीय डेअरी असोसिएशनच्या अध्यक्षपदी निवड झाली, ही देशातील डेअरी क्षेत्रातील सर्वोच्च संस्था आहे.
