बीडीएफएतर्फे अमित पाटील यांचा उपाध्यक्षपदी निवडीबद्दल सत्कार

बेळगाव : कर्नाटक राज्य फुटबॉल संघटनेच्यावतीने नूतन कार्यकारणीच्या बैठकीत बेळगावच्या अमित पाटील यांची कर्नाटक राज्य फुटबॉल संघटनेच्या उपाध्यक्षपदी प्रथमच वर्णी लागल्याबद्दल बेळगाव जिल्हा फुटबॉल संघटनेच्यावतीने नूतन उपाध्यक्ष अमित पाटील यांचा सत्कार करण्यात आला. बेळगाव येथे आयोजित करण्यात आलेल्या सत्कार समारंभात प्रमुख पाहुणे म्हणून दर्शन संघटनेचे संचालक श्रीकांत देसाई, बेळगाव जिल्हा फुटबॉल संघटनेचे अध्यक्ष पंढरी परब, पेट्रोल राम हादगल, खजिनदार एस. एस. नरगोडी आदी मान्यवर उपस्थित होते. मान्यवरांच्या हस्ते अमित पाटील यांचा खास सत्कार करण्यात आला. 1983 पासून बेळगाव जिल्हा फुटबॉल संघटना कर्नाटक राज्य फुटबॉल संघटनेशी संलग्न आहे. बेळगाव जिल्ह्याच्या फुटबॉलपटूंनी मिनी ऑलिम्पिक व कर्नाटक दसरा फुटबॉल स्पर्धेत अजिंक्यपद पटकावून बेळगावचे नाव उज्ज्वल केले होते. गेली काही वर्षे कोरोनाची महामारी व मैदानाला आकारण्यात आलेला भरमसाठ निधीमुळे स्पर्धा भरविणे कठीण झाले होते. अशावेळी कर्नाटक राज्य फुटबॉल संघटनेने आपल्या संघटनेत बेळगावच्या सभासदांना स्थान दिले. त्यामुळे चालू वर्षीपासून फुटबॉलच्या हंगामाला सुरुवात होण्याचे संकेत कर्नाटका फुटबॉल संघटनेने दिले आहेत. आपला प्रतिनिधी बेंगळूरात गेल्यामुळे बेळगावला मोठ्या स्पर्धा भरविण्याची संधी सुद्धा मिळेल. या मौसमात शालेय, महाविद्यालयीन व क्लबच्या स्पर्धा भरविण्यात येणार आहेत.