वृत्तसंस्था / अॅटलांटा (अमेरिका)
एटीपी टूरवरील येथे सुरू असलेल्या अॅटलांटा खुल्या पुरुषांच्या आंतरराष्ट्रीय टेनिस स्पर्धेत अमेरिकेच्या टेलर फ्रिट्झने वु यिबींगचा पराभव करत उपांत्यपूर्व फेरीत प्रवेश मिळवला. त्याचप्रमाणे जर्मनीच्या कोपफेरने डॅनियल इव्हान्सचे आव्हान संपुष्टात आणले.
अमेरिकेचा टॉप सिडेड टेलर फ्रिझने दुसऱ्या फेरीतील सामन्यात वु यिबींगचा 6-4, 7-6(7-5) असा पराभव करत शेवटच्या आठ खेळाडूत स्थान मिळविले. हा सामना दीड तास चालला होता. 2023 च्या टेनिस हंगामामध्ये आता टेलर फ्रिझ एटीपी टूरवरील दुसरी स्पर्धा जिंकण्यासाठी आतुरलेला आहे. गेल्या फेब्रुवारी महिन्यात फ्रिझने डिलेरी बिच टेनिस स्पर्धा जिंकली होती. जर्मनीच्या कोपफेरने तृतीय मानांकित डॅनियल इव्हान्सचा 2-6, 7-6(7-3), 6-4 असा पराभव करत पुढील फेरीत स्थान मिळवले. अन्य एका सामन्यात वुल्फने क्रेसीवर 7-6 (7-5), 6-3 अशी मात करत शेवटच्या आठ खेळाडूत स्थान मिळविले.
