अमीषा पटेल सध्या ‘गदर 2’ या चित्रपटाच्या यशामुळे चर्चेत आहे, तर दुसरीकडे तिच्या नव्या चित्रपटाचा ट्रेलर प्रदर्शित झाला आहे. अमीषा पटेलच्या या चित्रपटाचे नाव ‘मिस्ट्री ऑफ द टॅटू’ असून यात अर्जुन रामपाल, डेजी शाह आणि रोहित राज हे कलाकार दिसून येणार आहेत. हा चित्रपट एक मर्डर मिस्ट्री धाटणीचा असून याची कहाणी टॅटूशी निगडित असल्याचे सांगण्यात येत आहे.
या चित्रपटाद्वारे कलैयारासी सथप्पन यांनी बॉलिवूडमध्ये दिग्दर्शकीय पदार्पण केले आहे. याच्या ट्रेलरची सुरुवात पोलिसांच्या तपासापासून होते, ज्यानंतर मृतदेहावर एक टॅटू दिसून येतो. तसेच यात न्यायालयातील काही दृश्यं दाखविण्यात आली असून डेजी शाह यात अत्यंत अनोखी भूमिका साकारत आहे. या चित्रपटात अर्जुन रामपालचा लुक अत्यंत वेगळा आहे. मिस्ट्री ऑफ द टॅटू या चित्रपटाची निर्मिती अनुश्री शाह, गजीनाथ जयकुमार आणि कशिश खान यांनी केली आहे. चित्रपटात मायरा सरीन, मनोज जोशी, अरुण कपूर, टॉम हेंड्रिक, सायरा पंढाल आणि सुकी चॉट यांनीही महत्त्वाची भूमिका साकारली आहे. हा चित्रपट 1 सप्टेंबरला प्रदर्शित होईल.
