अर्थसंकल्पाच्या कार्यवाहीसाठी सर्व खाते सचिवांची आज बैठक

पणजी ; विधानसभा अधिवेशनात अलिकडेच सादर करण्यात आलेल्या 2023-24 वर्षाच्या अर्थसंकल्पाची कार्यवाही करण्यासाठी मुख्यमंत्री डॉ. प्रमोद सावंत यांनी आतापासूनच पावले उचलली असून आज सोमवार 10 एप्रिल रोजी सर्व खाते सचिवांची महत्त्वाची बैठक बोलावली आहे. रु. 26840 कोटींची अर्थसंकल्प डॉ. सावंत यांनी जाहीर केला असून त्यातील योजना, तरतूदी यांची अंमलबजावणी करण्याच्या हेतूने ही बैठक आखण्यात आली आहे. योजना, तरतूदी पूर्ण क्षमतेने पुढे नेण्यासाठी कृती आराखडा तयार करण्याचे निर्देश खाते सचिवांना देण्यात आले आहेत. त्यावर आजच्या बैठकीत विस्ताराने चर्चा करण्यात येणार असून केंद्र सरकारच्या योजना लागू करण्यासाठी विशेष प्रकल्पाधिकारी (नोडल ऑफिसर) नेमण्यात येणार असल्याचे सूत्रांनी सांगितले. डॉ. सावंत यांनी अर्थसंकल्पातून अनेक नवीन योजना जाहीर केल्या असून विविध खात्यांच्या वार्षिक तरतुदींमध्ये भरीव वाढ केली आहे. गोवा स्वयंपूर्ण करण्यासाठी तसेच अर्थसंकल्पाची तातडीने कार्यवाही व्हावी म्हणून त्यांनी खाते सचिवांना कामाला लावले असून त्यासाठी कृती योजना सादर करण्याची सूचना सचिवांना देण्यात आली आहे. अनेक खाती त्यांना देण्यात आलेल्या तरतूदी रकमेचा वापरच करीत नाहीत, असे दिसून आल्यामुळे डॉ. सावंत यांनी त्याची दखल घेऊन सर्व खात्यांनी अर्थसंकल्पाचा पाठपुरावा करावा म्हणून ही बैठक बोलावली आहे.